طالبلرنینگ بدخشانده‌گی امنیه قوماندانلیگی‌نینگ معلوم قیلیشیچه، ولایت‌نینگ یفتل بالا اولسواللیگیده «لند کروزر» روسوملی موترنینگ اغدریلیشی عاقبتیده تۉرت کیشی، جمله‌دن، بیر عیال و بیر باله هلاک بۉلگن، ینه سکّیز کیشی جراحتلنگن.
طالبلرنینگ بدخشانده‌گی امنیه قوماندانلیگی مطبوعات سوزلاوچیسی احسان‌الله کامگار بو حادثه تیناوون، شنبه کونی (۲ عقرب) یفتل اولسواللیگی‌نینگ «کله قشقار» منطقه‌سیده صادر بۉلگنینی ایتگن.
اونینگ قۉشیمچه قیلیشیچه، جراحتلنگنلر دوالنیش اوچون بدخشان مرکزی فیض آباد شهریگه آلیب کېتیلگن، هلاک بۉلگنلرنینگ جسدلری اېسه تیک اوچر آرقه‌لی کوفاب اولسواللیگی‌گه یېتکزیلگن.
طالبلرنینگ بدخشانده‌گی امنیه قوماندانلیگی حادثه‌‌نینگ سببینی معلوم قیلمه‌گن.
سۉنگگی اوچ کون ایچیده مملکت‌نینگ ینه بیر نېچه ولایتیدن هم اۉلیم بیلن یکونلنگن یۉل-ترانسپورت حادثه‌لری حقیده خبرلر بېریلدی.
طالبلرنینگ جوزجانده‌گی امنیه قوماندانلیگی تیناوون «کرولا» روسوملی موتر موتورسیکل بیلن تۉقنه‌شیشی عاقبتیده موتور سیکل هیداوچیسی هلاک بۉلگنینی معلوم قیلگن.
طالبلرنینگ فراه‌ده‌گی خوفسیزلیک قوماندانلیگی هم جمعه کونی اوشبو ولایت‌نینگ فراه رود تومنیده یۉلاوچی تشووچی موترنینگ اغدریلیشی عاقبتیده اوچ کیشی، جمله‌دن، بیر عیال و بیر باله هلاک بۉلگنی، ینه ایکّی کیشی جراحتلنگنینی بیلدیرگن.
ترافیک حادثه‌لری هر ییلی افغانستان بۉیلب یوزلب کیشی‌نینگ حیاتیگه ضامن بۉله‌دی همده یوزلب آدم جراحتلنیشی و معلول بۉلیب قالیشیگه سبب بۉله‌دی.
اوشبو حادثه‌لرنینگ اکثریتیگه یۉللر‌نینگ یراقسیزلیگی و هیداوچیلر نینگ احتیاطسیزلیگی سبب بۉله‌یاتگنی ایتیله‌دی.
طالبلر رهبری هبت‌الله آخوندزاده یقینده ترافیک حادثه‌لریگه سبب بۉلگن شخصلرنی حبسگه آلیش و جزالش حقیده بویروق بېرگن. شونگه قره‌مه‌ی، مملکت‌نینگ تورلی ولایتلریده هر کونی بونده‌ی حادثه‌لر صادر بۉله‌یاتگنی حقیده خبرلر ترقه‌لماقده.
