افغانستان مرکزي بانکی رئیسی اۉرین‌باسری صدیق الله خالد جاري ییل آخریگچه وطنداشلرینگ بانک حسابلریگه قۉییلگن برچه چېکلاولر بېکار قیلینیشینی ایتدی.
خالد یک‌شنبه کونی (۳ عقرب) بۉلیب اۉتگن مطبوعات انجمنیده وطنداشلرنینگ بانکلرده‌گی امانتلری مقداری آشگنینی و جاري ییلده ۵ میلیارد افغانيگه کۉپه‌یگنینی معلوم قیلدی.
اونینگ قۉشیمچه قیلیشیچه، بانک مشتریلری‌نینگ حسابلریدن پول یېچیب آلیشگه قۉییلگن چېکلاولر جاري ییل آخریگچه تۉلیق بېکار قیلینه‌دی.
«ده افغانستان بانک» رئیسی اۉرین‌باسری اوشبو بانک مملکت نینگ برچه ولایتلری، تومنلری همده تورلی شهرلرده‌گی تجارت مرکزلریده بانک و مالیوي خدمتلرنی کېنگه‌یتیریشنی رېجه‌لشتیره‌یاتگنینی بیلدیردی.
شونینگدېک، او «اسلامي بانک ایشی» کېنگه‌یتیریلیشی حقیده هم معلومات بېردی. اونینگ ایتیشیچه، مملکتده‌گی آلتیته تجارت بانکی اسلامي بانک فعالیتی طلبلریگه جواب بېره‌دیگن شرطلرنی بجرگن. یقین آره‌ده اوشبو بانکلرگه اسلامي بانک فعالیتینی تۉلیق عملگه آشیریش اوچون جواز بېریلیشی رېجه‌لشتیریلگن.
طالبلر افغانستان‌ده حاکمیتنی قَیته اېگه‌لله‌گنیدن سۉنگ دولت و خصوصي بانکلردن پول یېچیب آلیشگه قتّيق چېکلاولر جاري اېتگن اېدی. دستلب هر بیر بانک مشتریسی اۉز حسابیدن هفته‌سیگه اتیگی ۲۰۰ اقش دالری یاکه ۲۰ مینگ افغاني یېچیب آلیش حقوقیگه اېگه بۉلگن.
بانکلرده نقد پول یېتیشمسلیگی اوشبو چېکلاولرنینگ جاري اېتیلیشیگه اساسي سببلردن بیری صفتیده کۉرسه‌تیلگن. کېینچه‌لیک بو مقدار بیر نېچه باسقیچده استه-سېکین آشیریلدی. حاضرده شخصلر حسابلریدن آییگه ۵۰۰ مینگ افغاني، دالرده‌گی حسابلردن اېسه ۱۵ مینگ اقش دالریگچه پول یېچیب آلیش ممکن.
