ایران عامه‌وي اخبارات واسطه‌لری ایران، پاکستان، تورکيه و سعوديه عربستانی اۉرته‌سیده تهرانده بۉلیب اۉتگن تۉرت تامانله‌مه اوچره‌شوو یکونلنگنینی خبر قیلدی.
صدا و سیما خبرگزارلیگی‌نینگ خبریگه کۉره، «اشتراکچیلر منطقه‌ده‌گی تۉرت دولت اۉرته‌سیده‌گی همکارلیکنی، جمله‌دن، منطقه‌ده تینچلیک و خوفسیزلیکنی مستحکملشگه قره‌تیلگن ملاقاتلرنی دوام اېتتیریشگه کېلیشیب آلدیلر».
اوشبو ییتکرمه خبریگه کۉره، اوچره‌شووگه ایران ملي خوفسیزلیک عالي کېنگشی کاتبی محسن رضایي مېزبانلیک قیلگن. اونده پاکستان اوردوسی قوماندانی عاصم منیر، تورکيه ملي استخبارات تشکیلاتی باشلیغی ابراهیم کَلین همده سعوديه عربیستانی مدافعه وزیری خالد بین سَلمان اشتراک اېتگن.
حاضرچه اوچره‌شووده محاکمه قیلینگن مسأله‌لر و احتمالي کېلیشوولر حقیده باتفصیل معلومات نشر قیلینمه‌گن.
صدا و سیما شونینگدیک، اوچره‌شوونینگ اساسي کون ترتیبی «امریکا و اسرایل نینگ ایرانگه قرشی تجاوزینی محاکمه قیلیش، منطقوي خوفسیزلیک، فلسطین و لبنان‌نینگ مظلوم خلقلرینی قۉللب-قوّتلش همده منطقه خوفسیزلیگینی منطقه دولتلری‌نینگ اۉزلری تأمینلشی ضرورلیگینی تأکیدلش»دن عبارت بۉلگنینی یازدی.
«مکه پیمانی»گه اعضا دولتلر وکیللری اوچره‌شوو باشلنیشیدن آلدین ایران جمهور رییسی مسعود پزشکيان بیلن هم اوچره‌شیب، مذاکره‌لر اۉتکزگن اېدی.
ایرنت اخبارات آژانسی خبریگه کۉره، پزشکيان اوشبو موضوعگه توخته‌لر اېکن، «ایران اسلام جمهوریتی اسلامي دولتلر اۉرته‌سیده‌گی بیرلیک و هم‌جهتلیکنی مستحکملشگه قره‌تیلگن هر قنده‌ی کېلیشوونی قۉللب-قوّتله‌یدی»، دېب ایتگن.
او، شونینگدېک، اسلامي دولتلر اۉرته‌سیده بیرلیک و یقینلشوونی مستحکملش، کېلیشماوچیلیکلرنی برطرف اېتیش همده عمومي امکانیتلردن ثمره‌لی فایده‌لنیش ضرورلیگینی تأکیدله‌گن.
