پاکستان اخبارات و مطبوعات وزیرلیگی طالبلر سۉزلاوچیسی ذبیح‌الله مجاهدنینگ سۉنگگی بیاناتلریگه مناسبت بیلدیرر اېکن، اسلام آباد بیلن بو گروه اۉرته‌سیده‌گی مناسبتلرنینگ یامانلشووی‌نینگ اساسي سببی «افغانستان توپراغیدن کېلیب چیقه‌یاتگن تروریزم» اېکنینی ایتدی.
بو وزیرلیک شنبه کېچه‌سی (۹ عقرب) بیانات ترقه‌تیب، طالبلر مناسبتلرنینگ یامانلشوویگه سبب بۉله‌یاتگن اساسي معما بیلن یوزلشیشگه تیار اېمسلیگینی و بو یاندشوو «چوقور خطا» اېکنینی تأکیدله‌دی.
پاکستان اخبارات و مطبوعات وزیرلیگی: «طالبلر رهبریتی همان اسلام آباد سیاستینی عیبدار دېب بیلماقده، عینِ پیتده ایکّی تامانله‌مه مناسبتلرنی زهرله‌یاتگن اېنگ مهم مسأله‌نی اته‌یلب اعتباردن چېتده قالدیرماقده» دېب بیلدیردی.
وزیرلیک‌نینگ قۉشیمچه قیلیشیچه، اسلام آباد و طالبلر اۉرته‌سیده‌گی مناسبتلرده‌گی معمالرنینگ اېنگ مهم مسأله‌سی و اساسي ایلدیزی «طالبلرنینگ افغانستان توپراغیدن دن کېلیب چیقه‌یاتگن تروریزم معماسینی حل قیلیشده‌گی دوامي عاجزلیگی و بوندن باش تارتیشی» بۉلیب، بو حالت نارمل مناسبتلر اۉرنه‌تیلیشیگه تۉسقینلیک قیلماقده.
پاکستان اخبارات و مطبوعات وزیرلیگی «تروریزم قیزیل چیزیق و پاکستان فقرالری‌نینگ خوفسیزلیگی مذاکره قیلینمه‌یدیگن مسأله» اېکنینی تأکیدله‌دی.
اسلام آباد ینه بیر بار آگاهلنتیریب: «افغانستان‌نینگ طالبلر رژیمی پاکستان چېگره‌لری‌نینگ نریگی تامانیده مملکت خوفسیزلیگیگه تأثیر کۉرسه‌ته‌یاتگن ترورچیلیک باش‌پناه‌لری نینگ موجودلیگیگه پاکستان طاقت قیلمسلیگینی و اۉز خلقی‌نینگ افغانستاندن کېلیب چیقه‌یاتگن تروریزم نشانیگه ایلنیشیگه یۉل قۉیمسلیگینی بیلیشی کېره‌ک»، دېدی.
بو حالت ذبیح‌الله مجاهد، طالبلر سۉزلاوچیسی، بو گروه پاکستان بیلن ضدیتنی «تینچ یۉل» بیلن حل قیلیش اوچون حرکتلر آلیب بارگنینی، بیراق بو اورینیشلر حاضرگچه نتیجه بېرمه‌گنینی ایتگن بیر پیتگه تۉغری کېلماقده.
مجاهد یقینده طالبانگه یقین «حریت» رادیوسیگه بېرگن صحبتیده پاکستان تینچ یۉلنی تنلشگه تیار اېمسلیگینی ایتگن.
پاکستان و طالبلر اۉرته‌سیده‌گی کېلیشماوچیلیکلر پاکستانده‌گی خوفسیزلیک معمالری همده پاکستان طالبان تحریک (تی‌تی‌پی) کبی پاکستانلیک گروهلرنینگ فعالیتی بیلن باغلیق. پاکستان بو گروهلر افغانستانده موجودلیگینی و هجوملرینی اوشبو مملکت توپراغیدن رېجه‌لشتیره‌یاتگنینی ایته‌دی.
اسلام آباد بیر نېچه بار طالباندن پاکستانلیک گروهلرگه قرشی چاره کۉریشنی سۉره‌گن. بیراق طالبلر افغانستانده خارجي گروهلر موجودلیگینی انکار اېته‌دی و پاکستانده‌گی بې‌قرارلیکنی بو مملکت نینگ ایچکی معماسی دېب حسابله‌یدی.
پاکستان اخبارات و مطبوعات وزیرلیگی اۉزی‌نینگ سۉنگگی بیاناتیده عیبنی باشقه‌لرگه یوکلش، بۉش وعده‌لر بېریش همده پاکستان سیاستینی شبهه آستیگه قۉییش نه بحراننی حل قیلیشینی، نه کابلنی اۉز مسوولیتیدن آزاد قیلیشینی بیلدیردی.
وزیرلیک پاکستان خوفسیزلیگی «افغانستان طالبلری‌نینگ حرکتسیزلیگی، مسوولیتدن قاچیشی یاکه ناتۉغری اوستوارلیکلری گروی» بۉلمسلیگی کېره‌کلیگینی تأکیدله‌دی.
