طالبلر باش وزیری ملا محمد حسن آخوند بلاروس‌نینگ افغانستانده‌گی ینگی غیر مقیم اېلچیسی الکساندر سریگوویچ اوگورود نیکوف‌نینگ ایشانچ یارلیغینی قبول قیلدی.
طالبلر باش وزیری اداره‌سی‌نینگ معلوم قیلیشیچه، ملا محمد حسن آخوند بوگون (یک‌شنبه، ۱۰عقرب) توشگچه گُلخانه قصریده اۉتکزیلگن مراسمده بلاروس نینگ ینگی اېلچیسی ایشانچ یارلیغینی قبول قیلگن.
طالبلر باش وزیری بلاروس‌نینگ ینگی اېلچیسیگه «افغانستان و بلاروس اۉرته‌سیده‌گی مناسبتلرنینگ ینگی باسقیچی ایکّی دولت اۉرته‌سیده‌گی ایشانچ و علاقه‌لرنی مستحکملشگه بۉلگن ایشانچنی نمایان اېته‌دی. سیزنینگ ماموریتینگیزنینگ باشلنیشی ایکّی دولت اۉرته‌سیده‌گی سیاسي، اقتصادي و ترانزیت علاقه‌لرنی ینه‌ده مستحکمله‌یدی»، دېگن.
او تورلی ساحه‌لرده هر تامانله‌مه همکارلیک قیلیشگه تیار اېکنینی بیلدیرگن.
طالبلر باش وزیری اداره‌سی بیاناتیگه کۉره، بلاروس‌نینگ ینگی اېلچیسی مملکتی افغانستان بیلن قیشلاق خۉجه‌لیگی، آزیق-طعام محصولاتلری و دارو-درمانلر ساحه‌لریده‌گی سودا-ساتیقنی کېنگه‌یتیریشینی ایتگن.
او طالبلر هیئتلری‌نینگ بلاروسگه تشریفلری مینسک نینگ علاقه‌لرنی کېنگه‌یتیریشگه بۉلگن ایشانچینی آشیرگنینی تأکیدله‌گن.
بلاروس‌نینگ ینگی غیر مقیم اېلچیسی بوندن اوّل طالبلر تشقی ایشلر وزیری امیرخان متقي بیلن هم اوچره‌شیب، اونگه ایشانچ یارلیغی‌نینگ نسخه‌سینی تاپشیرگن اېدی.
طالبلر تشقی ایشلر وزیری هم ینگی اېلچیگه فعالیتیده موفقیت تیله‌ب، اونگه هر تامانله‌مه همکارلیک قیلیشگه وعده بېرگن اېدی.
روسيه‌‌نینگ یقین اتفاقچیلریدن بیری بۉلگن بلاروس طالبلر افغانستانده حاکمیتنی قَیته قۉلگه کیریتگنیدن بېری اوشبو گروه بیلن سیاسي و اقتصادي علاقه‌لرنی کېنگه‌یتیریشگه حرکت قیلیب کېلماقده.
بو دور مابینیده طالبلر رسميلری بلاروسگه بیر نېچه بار تشریف بویورگن، بلاروس رسميلری هم کابلگه کېلگن.
