طالبلرنینگ پکتیکا ولایتی امنیه قوماندانلیگی پاکستان حربيلری نینگ اوشبو ولایت‌نینگ شکین تومنیگه اویوشتیرگن هجوملریده بیر یاش ییگیت هلاک بۉلگنینی، ینه ایکّی نفر تینچ اهالی یره‌لنگنینی معلوم قیلدی.
مذکور قوماندانلیک بیاناتیده ایتیلیشیچه، بوگون (یکشنبه، ۱۰عقرب) توشدن کېین ساعت ۳:۱۰ لر اطرافیده پاکستان حربيلری شکین اواسواللیگی‌نینگ «سورداغ» قیشلاغیده تینچ اهالی‌نینگ اویلرینی نشانگه آلگن.
طالبلر امنیه قوماندانلیگی هجوم نینگ تورینی انیق کۉرسه‌تمه‌گن، بیراق اوشبو گروهگه علاقه‌دار عامه‌وي اخبارات واسطه‌لری حدودگه آغیر قوراللردن آتیلگن سناریدلر کېلیب توشگنینی خبر قیلگن.
قوماندانلیک معلوماتیگه کۉره، اوشبو هجومده بیر یاش ییگیت هلاک بۉلگن، ایکّی نفر اۉقووچی اېسه یره‌لنگن. بیاناتده تینچ اهالی نینگ اویلریگه هم مادّي ضرر یېتگنی ایتیلگن.
طالبلرنینگ پکتیکاده‌گی امنیه قوماندانلیگی بوندن آلدین هم پاکستان حربيلری‌نینگ هجوملریده اوشبو ولایت‌نینگ شکین و برمل اولسواللیکلریده‌گی تینچ اهالی نینگ اویلری نشانگه آلینگنینی قۉشیمچه قیلگن.
پاکستان رسميلری حاضرگچه اوشبو هجوملر یوزه‌سیدن ایضاح بېرمه‌گن.
طالبلر و پاکستان حربيلری بوگون توشگچه تورخم چېگره حدودیده هم اۉزارا تۉقنه‌شگن.
بیر نېچه کون آلدین هم تورخمده طالبلر و پاکستان حربيلری اۉرته‌سیده تۉقنه‌شوو یوز بېرگن اېدی.
طالبلرینگ ایتیشیچه، اۉشه تۉقنه‌شووده ایکّی باله هلاک بۉلگن.
