طالبلرنینگ سمنگان ولایتیده‌گی امنیه قوماندانلیگی‌نینگ معلوم قیلیشیچه، حضرت سلطان اولسواللیگیده بیر عیال اېری تامانیدن تیاقله‌نیب اۉلدیریلگن.
طالبلرنینگ سمنگان ولایتیده‌گی امنیه قوماندانلیگی مطبوعات سوزلاوچیسی حشمت الله‌نینگ رحماني ایتیشیچه، اوشبو عیال بوگون (یک‌شنبه، ۱۰ عقرب) توشدن کېین باشیگه یېتکزیلگن جراحت عاقبتیده وفات اېتگن.
رحماني‌نینگ ایتیشیچه، عیال‌نینگ اېری قاتللیکده عیبلنیب حبسگه آلینگن.
او قاتللیک سببینی عایله‌وي معمالر بیلن ایضاحله‌گن و بو باره‌ده قۉشیمچه تېرگاو ایشلری آلیب باریله‌یاتگنینی ایتگن.
افغانستان‌ده عیاللرگه نسبتاً زۉرآورلیک نینگ اساسي قِسمینی تشکیل اېتووچی عایله‌وي زۉرآورلیک طالبلر حاکمیتگه قَیتگنیدن کېین کوچه‌یگن کۉرینه‌دی.
طالبلر عیاللرنی زۉرآورلیکدن حمایه قیلووچی تشکیلاتلرنی توگتگن بیر پیتده، فرمانلر چیقریش آرقه‌لی عیاللرگه نسبتاً زۉرآورلیک‌نینگ معلوم درجه‌سیگه یۉل قۉیگن.
طالبلر محکمه‌لری‌نینگ جنایت کودیده عایله‌وي زۉرآورلیک فقط عیال‌نینگ سویه‌گی سینگن یاکه کۉزگه کۉرینه‌دیگن جراحتلر آلگن حالتلرده‌‌گینه جنایت دېب بېلگیلنگن.
بو گروه «اېر-خاتیننی اجره‌تیش قاعده‌لری»نی جاري اېتیش آرقه‌لی عیاللرنینگ زۉرآورلیککه اساسلنگن مناسبتلردن چیقیب کېتیشینی قیینلشتیرگن.
