بیرلشگن ملتلر تشکیلاتی‌نینگ تعلیم، فن و مدنیت تشکیلاتی (یونسکو)نینگ معلوم قیلیشیچه، ۲۰۰۶-ییلدن ۲۰۲۵-ییلگچه دنیاده ۱۶۰۰ دن آرتیق ژورنالیست اۉلدیریلگن.
اوشبو تشکیلات بوگون (دوشنبه، ۱۱عقرب) «ژورنالیستلرگه قرشی جنایتلر اوچون جزاسیزلیککه برهم بېریش خلق‌ارا کونی» مناسبتی بیلن بېرگن بیاناتیده ایتیشیچه، فقط ۲۰۲۴ و ۲۰۲۵-ییللرده زۉرآورلیک هجوملری عاقبتیده ۱۸۹ نفر ژورنالیست هلاک بۉلگن. اولر نینگ ۵۰ کیشی آلتیته ماجرا حدودیده اوچووچیسیز اوچیش اپاراتلری هجوملری نتیجه‌سیده اۉلدیریلگن. بو ژورنالیستلر اوچون تکنالوژي‌گه اساسلنگن ینگی تهدیدلر پیدا بۉله‌یاتگنینی کۉرسه‌ته‌دی.
یونسکونینگ تأکیدلشیچه، شونگه قره‌مه‌ی، ژورنالیستلرگه قرشی جنایتلر بۉییچه دنیاده‌گی جزاسیزلیک درجه‌سی همان ۸۵ فایزنی تشکیل اېته‌دی و ژورنالیستلرنینگ اۉلدیریلیشی بیلن باغلیق هر یېتّی حالتدن قریب آلتیته‌سی هنوزگچه سود-حقوقي جهتدن حل اېتیلمه‌گن.
اوشبو تشکیلات‌نینگ ایتیشیچه، جزاسیزلیک قاتللیکلرنینگ تکرارلنیشیگه آلیب کېله‌دی و کۉپینچه ماجرالرنینگ کوچه‌ییشی همده حقوقي و محکمه تیزیملری‌نینگ یېمیریلیشیدن درَک بېره‌دی.
بیرلشگن ملتلر تشکیلاتی‌نینگ تعلیم، فن و مدنیت تشکیلاتی بو حالتدن خواطر بیلدیرگن و جزاسیزلیک انسان حقوقلری‌نینگ قۉپال بوزیلیشی، فساد و جنایتلرنی یشیریش آرقه‌لی بوتون جمعیتگه ضرر یېتکزیشینی تأکیدله‌گن.
یونسکو حکومتلر، فقرالیک جمعیتی، عامه‌وي اخبارات واسطه‌لری همده قانون اوستوارلیگینی تأمینلشگه بې‌فرق بۉلمه‌گن برچه تامانلرنی ژورنالیستلرگه قرشی جنایتلر اوچون جزاسیزلیککه برهم بېریش بۉییچه گلوبل سعی-حرکتلرگه قۉشیلیشگه چقیرگن.
شو بیلن بیرگه، یونسکو اَیریم مملکتلرده ژورنالیستلرگه قرشی جنایتلر اوچون جوابگرلیکنی تأمینلش باره‌سیده ایجابي اۉزگریشلر کوزه‌تیله‌یاتگنینی کۉرسه‌تووچی دلیللر هم موجودلیگینی بیلدیرگن.
یونسکونینگ ایتیشیچه، قوراللی ماجرا صادر بۉلمه‌یاتگن مملکتلرده اۉلدیریلگن ژورنالیستلر سانی ۶۲ نفرگچه کمه‌یگن. بو سۉنگگی ۱۸ ییل ایچیده‌گی اېنگ پست کۉرسه‌تکیچدیر.
اوشبو تشکیلات معلوم قیلیشیچه، مذکور مملکتلرده جزاسیزلیک درجه‌سی هم ۲۰۱۲-ییلدن بویان ۱۷ فایزگه کمه‌ییب، ۷۷فایزگه توشگن.
یونسکو «تهدیدلر اۉزگره‌دی، اما جزاسیزلیک قاله‌دی» شعاری آستیده کمپنی باشله‌گن. اوشبو کمپنی ژورنالیستلر آلدیده پیدا بۉله‌یاتگن ینگی تهدیدلر همده اوروش و اوروش بۉلمه‌گن محیطلرده جزاسیزلیک نینگ تورلی کۉرینیشلریگه اعتبار قره‌ته‌‌دی.
تشکیلات‌نینگ تأکیدلشیچه، مذکور کمپنی اۉزگریب باره‌یاتگن تهدیدلرگه، اینیقسه، اوروش حدودلریده‌گی تهدیدلرگه ماس کېله‌دیگن جوابگرلیک میکانیزملرینی یره‌تیشگه چقیره‌دی.
