افغانستان‌نینگ بیرلشگن ملتلر تشکیلاتیدهگی نماینده‌لیگی‌نینگ سرپرستی نصیر احمد فایق عیاللر و یاشلر نینگ تعلیم آلیش همده اجتماعي حیاتده اشتراک اېتیشدن محروم قیلینه‌یاتگنیدن خواطر بیلدیریب، عیاللر و یاشلر مملکت کېله‌جگینی بېلگیله‌یدیگن قرارلرنی قبول قیلیش جریانیده اشتراک اېتیشی کېره‌کلیگینی تأکیدله‌دی.
فایق بو فکرلرنی دوشنبه کونی (۱۱عقرب) بیرلشگن ملتلر تشکیلاتی‌نینگ عمومی ییغیلیشی نینگ «اوچینچی کمیته‌سی» ییغیلیشی دایره‌سیده اۉتکزیلگن «افغانستان یاشلری چارراهه‌ده: حقوقلر، آرزولر، معمالر و امکانیتلر» موضوعسیده‌گی ییغیلیشده بیلدیردی.
اونینگ ایتیشیچه، سۉنگگی بېش ییل دوامیده یاشلرنینگ تعلیم آلیش، ایش بیلن تأمینلنیش و اجتماعي حیاتده اشتراک اېتیش یۉلیده کېنگ کۉلملی چېکلاولر جاري اېتیلگن و بو حالت، اینیقسه، قیزلر و عیاللر اوچون آغیر عاقبتلرگه آلیب کېلگن.
فایق «یونیسف» معلوماتلریگه ته‌یه‌نیب، ۲۰۲۱-ییلدن بویان ۲.۶ میلیوندن آرتیق قیز اۉرته تعلیم آلیش امکانیتیدن محروم بۉلگنینی ایتدی. اونینگ سۉزلریگه کۉره، بیلیم یورتلر همان عیاللر اوچون یاپیق، ایش قیلیش و حرکتلنیشگه قۉییلگن چېکلاولر اېسه اولر نینگ مستقللیگی و حیات امکانیتلرینی کمه‌یتیرگن.
افغانستان‌نینگ بیرلشگن ملتلر تشکیلاتیدهگی نماینده‌لیگی سرپرستی نصیر احمد فایق شونینگدېک، یاشلرنینگ زمانه‌وي فنلر اۉرنیگه دیني تعلیمگه یۉنه‌لتیریله‌یاتگنیدن خواطر بیلدیردی.
اونینگ ایتیشیچه، ۲۰۲۵-ییل سپتمبر حالتیگه کۉره، افغانستانده ۲۳مینگدن آرتیق دیني مکتب تشکیل اېتیلگن.
فایق دیني مکتبلر‌نینگ عمومي تعلیم اۉرنینی تاباره کۉپراق اېگه‌للشی، چېت تیللری و مدنی مضمونلر نینگ تعلیم دستوریدن چیقریب تشلنیشی یاشلرنینگ بوگونگی کونده‌گی علمي و کسبي احتیاجلرگه جواب بېریش صلاحیتینی چېکلشی ممکنلیگیدن آگاهلنتیردی.
او یسمه آنگ و ایش بازاریده‌گی تېزکار اۉزگریشلرگه اشاره قیلیب، افغانستان یاشلری کېله‌جکده ثمره‌لی رۉل اۉینشی اوچون علمي بیلیم، رقملی کۉنیکمه‌لر و تنقیدي فکرلشگه محتاج اېکنینی ایتدی.
فایق نینگ قۉشیمچه قیلیشیچه، طالبلر سیاستیدن فقط عیاللر اېمس، بلکه اۉغیل باله‌لر و یاش اېرککلر هم تأثیرلنماقده. اولر قشّاقلیک، ایش ا‌ۉرینلری‌نینگ یېتیشمسلیگی، تعلیم امکانیتلری نینگ قیسقریشی و سۉز اېرکینلیگیگه قۉییلگن چېکلاولرگه دوچ کېلماقده.
اونینگ ایتیشیچه، بیر اولادنی تعلیم و جمعیتده اشتراک اېتیش امکانیتیدن محروم قیلیش افغانستاننی ترقیات اوچون ضرور بۉلگن کۉنیکمه و صلاحیتلردن ماسووا اېته‌دی.
فایق خوفسیز تعلیم امکانیتلری، بورسیه‌لر، کۉنیکمه‌لرنی رواجلنتیریش و یاشلر تشبثلرینی قۉللب-قوّتلشگه چقیردی. او مقابل تعلیم دستورلری، گرچه یاردم بېریشی ممکن بۉلسه-ده، مکتبلر و بیلیم یورتلرنینگ قَیته آچیلیشی نینگ اۉرنینی هېچ قچان باسه آلمه‌سلیگینی تأکیدله‌دی.
افغانستان ایچیدن آنلاین طرزده اوشبو ییغیلیشگه قۉشیلگن بیر گروه یاشلر هم صفتلی تعلیمدن فایده‌لنیش امکانیتلرینی کېنگه‌یتیریش و کېله‌جک اولاد تعلیمینی قۉللب-قوّتلش ضرورلیگینی تأکیدله‌دی. اولر اۉز بیلیم و کۉنیکمه‌لریدن فایده‌لنیشلری اوچون ایش ا‌ۉرینلری و مصافه‌دن توریب ایشلش امکانیتلرینی یره‌تیشنی سۉردی.
