طالبلرنینگ نیمروزده‌گی امنیه قوماندانلیگی ایرانگه ناقانوني یۉل بیلن سفر قیلیشگه اورینگن ۳۰۰ کیشیدن آرتیق آدمنی قۉلگه آلگنینی معلوم قیلدی.
طالبلرنینگ نیمروزده‌گی امنیه قوماندانلیگی مطبوعات سوزلاوچیسی گُل محمد قدرت بوگون (سه‌شنبه، ۱۲ عقرب) معلوم قیلیشیچه، بو شخصلر زرنج شهری‌نینگ اوچینچی ناحیه‌سیده آدم سوداگرلری تامانیدن تشکیل اېتیلگن «یشیرین جای»دن قۉلگه آلینگن.
اونینگ قۉشیمچه قیلیشیچه، بیر کیشی آدم سوداسی بیلن شغللنیشده عیبلنیب قۉلگه آلینگن، شونینگدېک، سکّیزته تویتا روسوملی اتوموبیلنی اۉز ایچیگه آلگن جمع‌ی ۱۰ته موتر انیقلنیب، مصادره قیلینگن.
طالبلرنینگ نیمروزده‌گی امنیه قوماندانلیگی مطبوعات سوزلاوچیسی ینه ۳۰کیشی نینگ دلرام–زرنج یۉنه‌لیشیده ایرانگه ناقانوني یۉل بیلن سفر قیلیشگه اورینگنلیکده عیبلنیب قۉلگه آلینگنینی ایتگن.
اونینگ سۉزلریگه کۉره، بو شخصلرنی آلیب اۉتیشده گمان قیلینگن بیر کیشی هم قۉلگه آلینگن و بیر یوک مو‌تری مصادره قیلینگن.
طالبلرنینگ نیمروزده‌گی امنیه قوماندانلیگی بوندن آلدین هم ایرانگه ناقانوني یۉل بیلن باریشگه اورینگنلیکده عیبلنگن شخصلرنینگ قۉلگه آلینگنی حقیده بیر نېچه بار خبر بېرگن.
افغانستان‌ده قشّاقلیک و ایشسیزلیک‌نینگ کېنگه‌ییشی، شونینگدېک، ایران ویزه‌لرینی بېریش جریانی توخته‌ب قالگنی سببلی کۉپلب افغانستانلیکلر ایشلش اوچون ناقانوني یۉللر آرقه‌لی ایرانگه باریشگه حرکت قیلماقده.
