بیرلشگن ملتلر تشکیلاتینینگ افغانستاندهگی ترقیات دستوری نمایندهلیگی دهقانلر آزیق-طعام محصولاتلری یېتیشتیریشنی تأمینلش اوچون دهقانچیلیک اصوللرینی اقلیم اۉزگریشیگه ماسلشتیریشلری کېرهکلیگینی معلوم قیلدی.
اوشبو تشکیلات بوگون (یکشنبه ۱ قوس) ایکس اجتماعي ترماغیده نشر قیلگن بیاناتیده شوندهی دېدی: «اقلیم اۉزگریب بارماقده. دهقانلر کېلهجکده آزیق-طعام محصولاتلری یېتیشتیریشنی کفالتلش اوچون اۉز اصوللرینی ینگی شرایطلرگه ماسلشتیریشلری کېرهک».
بیر ملتلر تشکیلاتینینگ ترقیات دستوری «اقلیم اۉزگریشیگه ماسلشگن جماعهوي تیریکچیلیک و اۉرمان خۉجهلیگی» ناملی لایحه آرقهلی افغانستاندهگی دهقانلرنی قۉللب-قوّتلهیاتگنینی بیلدیردی. مذکور لایحه «گلوبل اېکالاگیک جمغرمه» تامانیدن مالیهلشتیریلهدی.
تشکیلاتنینگ معلوم قیلیشیچه، بدخشان ولایتینینگ ارگو و کاشیم اواسواللیکلری همده کنر ولایتینینگ شیگیل اولسواللیگیدهگی ۱۵۰ نفر دهقانگه قیشلاق خۉجهلیگی واسطهلری و بوغدای اوروغلری ترقهتیلگن.
شونینگدېک، دهقانلرگه «اقلیم اۉزگریشیگه چیدملی بوغدای» یېتیشتیریش همده کیمیاوي اۉغیتلردن ثمرهلی فایدهلنیش بۉییچه ترېنینگلر اۉتکزیلگن.
تشکیلاتنینگ تأکیدلشیچه، اوشبو لایحهلر محلي جماعهلرگه حاصلدارلیکنی آشیریش، آزیق-طعام خوفسیزلیگینی مستحکملش و اقلیم اۉزگریشی عاقبتلریگه نسبتاً برقرارلیکنی کوچهیتیریشگه یاردم بېرهدی.
افغانستان ایسّیقخانه گازلری ترقهلیشی و اقلیم اۉزگریشیگه سبب بۉلووچی عامللرده دېیرلی اشتراک اېتمسه-ده، اوشبو حادثهدن اېنگ کۉپ ضرر کۉرهیاتگن ۱۰ ته دولت قطاریگه کیرهدی.
اقلیم اۉزگریشی عاقبتیده یوزهگه کېلهیاتگن قورغاقچیلیک، ویرانکار سوو تاشقینلری و موسمي ضررکنندهلر افغانستانده قیشلاق خۉجهلیگی محصولاتلری یېتیشتیریش حجمینی کمهیتیرماقده. بو عامللر هر ییلی مملکت بۉیلب دهقانلرنینگ باغلر کبی برقرار درآمد منبعلریگه ضرر یېتکزماقده.
افغانستان تحلیلچیلر ترماغی (افغانستان تحلیل چیلر ترماغی) ۲۰۲۵-ییل ۲۲-مارچ کونی نشر قیلگن تدقیقاتگه کۉره، افغانستان اقلیم اۉزگریشی و او بیلن باغلیق طبيعي آفتلر عاقبتیده هر ییلی ۳ میلیارد دالرگچه اقتصادي ضرر کۉرهدی.
