محلي منبعلرنینگ معلوم قیلیشیچه، ننگرهار ولایتینینگ سرخ رود اولسواللیگیده بیر عیال داکتر نامعلوم قوراللی شخصلر تامانیدن اۉلدیریلگن.
اسمی آشکار اېتیلیشینی ایستهمهگن منبعنینگ «اطلاعات روز» گزېتهسیگه بیلدیریب، واقعه یکشنبه آقشامی (۳۱-جوزا) سرخ رود اولسواللیگینینگ شیخ مصري منطقهسیده، داکترنینگ اۉز اوییده صادر بۉلگنینی ایتدی.
منبعنینگ سۉزلریگه کۉره، اۉلدیریلگن داکترنینگ آتی گُلالي بۉلیب، او اصلیده پچیراگام اولسواللیگینینگ یشاوچیسی بۉلگن.
او سرخ روددهگی دولت شفاخانهلریدن بیریده ایشلهگن و آتهسی بیلن بیرگه شیخ مصري شهرچهسیده یشب کېلگن.
منبعلرگه کۉره، نامعلوم قوراللنگن شخصلر کېچهسی اولرنینگ اوییگه باستیریب کیرگن. اولر اوّل گُلالينینگ آتهسی نینگ قۉل-آیاقلرینی باغلب قۉیگن، سۉنگ اېسه گُلالينی قتّيق قییناقلرگه سالیب، اۉلدیرگن.
هجوم دوامیده اونینگ آتهسی هم کلتکلنگن و بیر قۉلی سینگن.
معلوماتلرگه قرهگنده، گُلالي تخمیناً بېش آی اوّل ترقتگن اودیو پیامیده اَیریم طالبلر اعضالری تامانیدن تعقیب قیلینهیاتگنی و تهدید قیلینهیاتگنیدن شکایت قیلگن اېدی.
او اودیو یازووده اَیریم محلي طالبلر عملدارلری اوندن «ناقانوني جنسي طلبلر» قیلهیاتگنینی و حتا اۉلیم بیلن تهدید قیلگنینی ایتگن.
ننگرهاردهگی طالبلر مسووللری حاضرچه گُلالينینگ اۉلدیریلیشی یوزهسیدن هېچ قندهی رسمي ایضاح بېرمهگن.
