طالبلر فواید عامه وزیرلیگینینگ معلوم قیلیشیچه، جَنوبي سالنگ یۉلی نینگ۱۵ کیلومترلیک قِسمینی قَیته قوریش لایحهسی۱.۲ میلیارد افغانيدن آرتیق مبلغ عوضیگه خصوصي شرکت بیلن شرطنامه اساسیده عملگه آشیریلهدی.
وزیرلیک مطبوعات سۉزلاوچیسی محمد اشرف حقشناس بوگون (سهشنبه،۲-سرطان) نشر قیلگن بیاناتیده اوشبو شرطنامه «مبارز برکتزی» ناملی خصوصي قوریلیش و یۉلسازلیک شرکتی بیلن امضالنگنینی بیلدیرگن.
لایحه «اولنگ» حدودیدن باشلنیب، جبلالسراج تامان ۱۵ کیلومتر اوزونلیک و۱۲ متر کېنگلیکده اسفالت یۉل قوریشنی اۉز ایچیگه آلهدی.
شونینگدېک، لایحه دایرهسیده ۵ ته ینگی کۉپریکچه قوریش،۳۳ ته موجود کۉپریکچهنی کېنگهیتیریش همده یۉل نینگ بیر تامانیده ۶۰۰ متر اریق برپا اېتیش هم رېجهلشتیریلگن.
بیاناتگه کۉره، جَنوبي سالنگ یۉلی نینگ اوشبو۱۵ کیلومترلیک قِسمی اوچون عمومي۱ میلیارد۲۵۲ میلیون۷۸۳ مینگ۱۲۶ افغاني قیمتدهگی شرطنامه توزیلگن.
حساب-کتابلرگه کۉره، بو مبلغ اۉرتهچه۱امریکا دالری۶۴ افغانيگه تېنگ بۉییچه قریب۱۹.۶میلیون دالرنی تشکیل اېتهدی. بو اېسه هر بیر کیلومتر یۉلنی «قَیته قوریش» اوچون۱.۳میلیون دالردن آرتیق مبلغ صرفلنیشینی کۉرسهتهدی.
شرطنامه طالبلر فواید عامه وزیری ملا محمد عیسی ثانی و خصوصي شرکت نمایندهسی تامانیدن امضالنگن.
طالبان ۱۴۰۱-ییلدن (هجري-شمسي) باشلب سالنگ ترافیک یۉلی و تونلینی قَیته ترمیملشنی دولت بودجهسیگه کیریتگن بۉلسه-ده، لایحه حلی تۉلیق یکونلنمهگن.
