کابلدهگی تمدن تلویزیونی اۉزینینگ رسمي فیسبوک صحیفهسیده طالبلر کوچلری اوشبو تلویزیوننینگ مرکزي دفتریگه باستیریب کیرگنیدن سۉنگ اونینگ نشرات فعالیتی تۉختهتیلگنینی معلوم قیلدی.
تلویزیون بوگون (سهشنبه،۲-سرطان) ساعت۱۲:۲۰اطرافیده طالبلر کوچلرینینگ مرکزي ادارهسیگه یوریش اویوشتیرگنی حقیده خبر بېرگن اېدی.
تمدن تلویزیون بیاناتیده ایتیلیشیچه، بو یوریش « ایام تاسوعا و عاشورای حسینی» عرفهسیده عملگه آشیریلگن. تلویزیون «افغانستان نینگ مومن و ماتم توتهیاتگن خلقیدن» اوشبو مسألهنی دقّت بیلن کوزهتیب باریشنی و کېلگوسی واقعهلرگه نسبتاً هوشیار بۉلیشنی سۉرهگن.
طالبلرنینگ اخبارات و مدنیت وزیرلیگی همده خوفسیزلیک اۉرگانلری حاضرچه اوشبو مدیا تشکیلاتگه اویوشتیریلگن یوریش یوزهسیدن ایضاح بېرمهگن. شونینگدېک، تلویزیون نشراتی نیمه سببدن تۉختهتیلگنی هم حاضرچه نامعلوم.
تمدن تلویزیونی ۱۳۸۵هجري-شمسي ییلده محمد آصف محسنی تامانیدن تشکیل اېتیلگن بۉلیب، اساسن مدني، سیاسي، دیني و کۉنگیلآچر دستورلرنی اېفیرگه اوزهتیب کېلگن.
طالبان ۱۴۰۳-هجري-شمسي ییلده هم اوشبو تلویزیون ادارهسینی «حرکت اسلامي» حزبی بیلن سیاسي علاقهدارلیک و «غضب قیلینگن یېرده جایلشگنلیک» عیبلاولری بیلن یاپگن اېدی.
