امریکا و ایران اۉرتهسیده کېلیشوو امضالهنیب، اوروش حرکتلری تۉختهتیلگنیدن سۉنگ، امریکانینگ کویتدهگی اېلچیخانهسی اۉز فعالیتینی قَیته تیکلهدی.
امریکا تشقی ایشلر وزیری مارکو روبیو بوگون (چهارشنبه، ۳-سرطان) کویتگه سفری چاغیده مملکتنینگ امریکا اېلچیخانهسیده دولت بیراغینی کۉتریش مراسمیده شخصن اشتراک اېتدی.
مارکو روبیو، ایکس اجتماعي ترماغیده اعلان قیلگن خبریده شوندهی یازدی: «آزادلیک، بیردملیک و اېرکینلیک رمزی بۉلگن امریکا بیراغی ینه بیر بار فخر بیلن کویت شهری اوزره هیلپیرهماقده.»
او شونینگدېک، کویتنینگ منطقوي خوفسیزلیک و برقرارلیکنی تأمینلشدهگی مهم همکار اېکنینی تأکیدلب، امریکا برچه ساحهلرده اوشبو دولت بیلن همکارلیکنی ینه-ده مستحکملشگه اینتیلهیاتگنینی بیلدیردی.
امریکا اېلچیخانهسی فعالیتی مارچ آییده ایران تامانیدن عملگه آشیریلگن راکت و درون هجوملریدن سۉنگ وقتینچه تۉختهتیلگن اېدی.
شوندن کېین امریکا تشقی ایشلر وزیرلیگی اۉز فقرالریگه کویتنی ترک اېتیشنی توصیه قیلگن.
اوروش یکونلنیب، امریکا و ایران اۉرتهسیده شرطنامه امضالنگنیدن کېینگی ایلک منطقوي سفری دایرهسیده مارکو روبیو، کېچه بیرلشگن عرب امیرلیگیگه تشریف بویوردی، بوگون کویتده بۉلدی و سفر دوامیده بحرینگه هم باریشی رېجهلشتیریلگن.
ایران بیلن اوروش دوامیده امریکانینگ اوشبو اوچ مملکتده حربي مرکزلری بیر نېچه بار راکت همده درون هجوملریگه اوچرهگن. مذکور هجوملر عاقبتیده قربانلر و مادّي تلفاتلر قید اېتیلگنی بیلدیریلگن.
