آلمان باش وزیری فریدریش مرتس، آلمان پارلمانیده یشیللر حزبینینگ تنقیدلریگه جواب بېرر اېکن، طالبان بیلن ملاقاتنی ینه بیر بار حمایه قیلدی.
فریدریش مرتس چهارشنبه کونی (۳-سرطان) پارلمانده سۉزگه چیقیب، طالبلر بیلن علاقهلر فقط تخنیکي درجهده و مهاجرلرنی دېپورت قیلیش جریانینی یېنگیللشتیریش مقصدیده آلیب باریلهیاتگنینی ایتدی.
یشیللر حزبی اعضاسی سارا نانی مرتسدن شوندهی سۉردی: «سیز آلمان عسکرلری هم قرشی کورهشگن اسلامچی و عیاللرگه قرشی طالباننی عادتي حال صفتیده قبول قیلیب، اولرگه دۉستلیک قۉلینی اوزهتهیهپسیزمی؟»
فریدریش مرتس بونگه جوابن: «بیز بو رژیمنی نارمللشتیرمهیهپمیز. علاقهلر فقط تخنیکي درجهده موجود»، دېدی.
آلمان باش وزیری طالبان بیلن علاقهلرنی «آلمان منفعتلری اوچون» دېب بهالب، «بیز اولرگه دۉستلیک قۉلینی اوزهتهیاتگنیمیز یۉق»، دېیه تأکیدلهدی.
او ینه شوندهی دېدی: «دیپلوماتیک مناسبتلر حکومتلر اۉرتهسیده اېمس، دولتلر اۉرتهسیده موجود بۉلهدی. آلمان و افغانستان اۉرتهسیدهگی مناسبتلر اوزاق ییللردن بېری موجود.»
مرتسنینگ ایتیشیچه، ایچکی ایشلر وزیری الکساندر دوبرینت جنایت صادر اېتگن مهاجرلرنی دېپورت قیلیش اوچون طالبان بیلن تخنیکي همکارلیکنی باشلهگن و بو بارهده اونینگ تۉلیق قۉللب-قوّتلشیگه اېگه .
بو آلمان اوّلراق طالبلرنینگ ایکّی دیپلوماتینی برلیندهگی افغانستان اېلچیخانهسی و بندهگی قنسوللیکده ایشلش اوچون قبول قیلگن بیر پیتده یوز بېرماقده.
اۉتگن هفته آلمان تشقی ایشلر وزیرلیگی طالبان ینه تۉرت دیپلوماتنی قبول قیلیشنی سۉرهگنینی تصدیقلهدی.
آلمان نینگ طالبان بیلن علاقهلری باشیدن بېری افغانستان مهاجرلری همجمعيتی و انسان حقوقلری تشکیلاتلری تامانیدن کېسکین تنقید قیلینیب کېلماقده.
بیراق آلمان مۉدلی کېنگهییب بارماقده. یقینده اروپا کمیسیونی اروپا اتفاقی نینگ 20 اعضا دولتی طلبیگه بناءً طالبان هیئاتینی بروکسلگه تکلیف قیلیب، تخنیکي مذاکرهلرنی باشلهدی.
طالبان تشقی ایشلر وزیرلیگی مطبوعات سۉزلاوچیسی عبدالقهار بلخي، بروکسلگه تشریف بویورگن هیئتگه رهبرلیک قیلر اېکن، اروپادهگی افغانستان دیپلوماتیک وکالتخانهلریده طالبلر دیپلوماتلری نینگ قبول قیلینیشی احتمالی موجودلیگینی ایتدی. اونینگ سۉزلریگه کۉره، «قنسوللیک همکارلیگی» بروکسلدهگی مذاکرهلرنینگ بیر قِسمی بۉلگن.
