طالبلرنینگ قندهاردهگی محلي مسؤوللرینینگ معلوم قیلیشیچه، اوشبو ولایتده ایکّی نفر قوراللی تالانچی گروه کوچلری بیلن یوز بېرگن آتیشمهده اۉلدیریلگن.
طالبلرنینگ قندهار ولایتی امنیه قوماندانلیگی مطبوعات کاتبی اسدالله جمشیدنینگ اَیتیشیچه، حادثه بوگون (یکشنبه،۷سرطان) کېچقورون قندهار شهرینینگ تۉرتینچی خوفسیزلیک حوزه، لالک ماما بناسی یقینیده یوز بېرگن.
اونینگ سۉزلریگه کۉره، هلاک بۉلگن شخصلر صرافلیک بازاریدن مال-ملکینی آلیب کېتهیاتگن بیر سوداگردن ۱۲۰کیلوگرام کوموش و۴ میلیارد ایران تومنینی تالان-تاراج قیلیشگه اورینگن.
جمشید هلاک بۉلگنلرنینگ شخصی حقیده معلومات بېرمهگن. حادثه یوزهسیدن مستقل منبعلردن هم حاضرچه هېچ قندهی تصدیقلاوچی معلومات موجود اېمس.
طالبلر بوندن اوّل هم اۉغریلیکده عیبلنگن شخصلرنی بیر نېچه بار آتیب اۉلدیرگن. اَیریم حاللرده اېسه گروه اۉز مخالفلرینی هم اۉغریلیک عیبلاوی بیلن اۉلدیرگنی حقیده خبرلر ترقهلگن.
شونگه قرهمهی، طالبان خوفسیزلیک تأمینلنگنی حقیده دعوا قیلهیاتگن بۉلسه-ده، شهرلرده قوراللی تالانچیلیک و باشقه جنایتلر دوام اېتماقده.
