افغانستان نینگ سابق حکومتی پارلمانی وکیلی فوزیه کوفي پاکستان نینگ سۉنگگی هجوملریگه مناسبت بیلدیریب، تینچ اهالینی اۉلدیریش تروریزمگه قرشی کورهش نینگ ثمرهلی استراتیژيسی اېمسلیگینی ایتدی.
کوفي بوگون (سهشنبه، ۹-سرطان) ایکس اجتماعي ترماغیده یازیشیچه، تینچ اهالی هېچ قچان سیاسي یاکه حربي موفقیتسیزلیکلر اوچون بدل تۉلهمسلیگی کېرهک.
او شوندهی دېدی: «مېن حاضرگچه پاکستان نینگ هوا هجوملریده حتی بیرته هم طالبان رهبری یاکه یوقاری مرتبهلی عملداری نشانگه آلینگنینی کۉرمهدیم.»
کوفي نینگ تأکیدلشیچه، «تینچ اهالینی اۉلدیریش معمانی حل قیلمهیدی.»
اونینگ سۉزلریگه کۉره، پاکستان هجوملریده هلاک بۉلهیاتگنلر «طالبان نینگ سابق جمهوریتگه قرشی اوروشی دوامیده هم طالبان زۉرآورلیگیدن اذیت چېکّن بېگناه آدملردیر. بوگون هم اولر طالبان حکمرانلیگی آستیده قالیب، اېنگ کم امکانیتلر بیلن تیریک قالیش اوچون کورهشماقده.»
فوزیه کوفي ینه شوندهی دېدی: اگر پاکستان نینگ مقصدی تحریک طالبان پاکستان (تیتیپی)نی نشانگه آلیش بۉلسه، «افغانستانده دېیرلی هر قندهی کیشیدن سۉرهلسه، اولر بو گروه فعالیت یوریتهیاتگن جاینی کۉرسهتیب بېره آلهدی.»
او شونینگدېک، «قیشلاقلرنی بامباردمان قیلیش و اۉنلب ییللر دوامیده اوروش همده ظلمنی باشدن کېچیرگن تینچ اهالینی اۉلدیریشنی آقلب بۉلمهیدی و بو تروریزمگه قرشی ثمرهلی استراتیژي اېمس،» دېیه تأکیدلهدی.
بیرلشگن ملتلر تشکیلاتی نینگ افغانستاندهگی یاردم ادارهسی (یوناما) پاکستان نینگ سۉنگگی هوا هجوملری عاقبتیده پکتيا، پکتیکا و کنر ولایتلریده کمیده۲۸ نفر تینچ اهالی هلاک بۉلگنی، ینه 49 کیشی، جملهدن عیاللر و بالهلر یرهلنگنی تصدیقلهگن.
طالبان دستلب هجوملرده۳۶ کیشی هلاک بۉلگنی و۱۶۳ کیشی یرهلنگنینی معلوم قیلگن اېدی.
پاکستان اېسه بو هوا هجوملریده تحریک طالبان پاکستان (تیتیپی) نینگ یشیرین مسکنلری نشانگه آلینگنی و۲۵ نفر گروه اعضاسی یۉق قیلینگنینی بیلدیردی.
