ننگرهاردن آلینگن معلوماتلرگه کۉره، اوشبو ولایتنینگ بېش کیشی – یاش ییگیتی ایرانگه ناقانوني کیریشگه اورینگن پیتده چېگره حدودیده ایران چېگرهچیلرینینگ اۉقی عاقبتیده جان بېرگن.
منبعلر هلاک بۉلگنلرنی امجد، اسرار، وحدت، لیاقت و غلامنبی دېب تنیشتیریب، اولرنینگ ننگرهار ولایتی نینگ نازيان، اچین و غنیخیل اولسواللیکلری اهالیسی بۉلگنینی اَیتماقده.
منبعلرگه کۉره، اوشبو بېش ییگیت نینگ جسدی کېچه نیمرۉز آرقهلی افغانستانگه آلیب کېلینگن و اولرنینگ جماعهوي دفن مراسمی بوگون (پنجشنبه، ۱۱-سرطان) نازيان تومنیده اۉتکزیلگن.
ینه بیر منبعنینگ ایتیشیچه، بو ییگیتلر ۱۲-صنفگچه تحصیل آلگن بۉلیب، تخمیناً بیر آی اوّل ایش ایزلب ایرانگه یۉل آلگن.
اولر نیمرۉز چېگرهسی آرقهلی ایرانگه کیریشنی رېجهلشتیرگن اېدی. اوشبو ییگیتلرنینگ هلاک بۉلیشی اجتماعي ترماقلرده کېنگ عکس-صدا بېردی.
فایدهلنووچیلر طالباننی تنقید قیلیب، مملکتدهگی ایشسیزلیک سببلی یاشلر خارجي دولتلرگه ناقانوني یۉل بیلن کېتیشگه مجبور بۉلهیاتگنینی تأکیدلهدیلر.
بوندن آلدین هم بیر نېچه بار ایش ایزلاوچیلر و باشپناه ایزلاوچیلر ایران-افغانستان چېگرهسیده اۉققه توتیلیب، هلاک بۉلگن.
یقینده تورکيه-ایران چېگرهسیده فاریاب ولایتیدن بۉلگن 19 یاشلی ییگیت قییناقلر عاقبتیده وفات اېتگن، اونینگ اوچ نفر همراهی اېسه قۉل و قبیرغهلری سینیشی کبی آغیر جراحتلر آلگن.
اوشبو یاشلر بیر مدت آلدین ایراندن تورکيه چېگرهسی تامان یۉل آلیب، آررات تاغی آرقهلی تورکيهگه کیریشگه اورینگن اېدی. منبع نینگ ایتیشیچه، تورکيه چېگره خادملری اوشبو باشپناه ایزلاوچیلرنی تۉختهتیب، قییناققه سالگن.
