بریتانيا دېنگیز تجارتی عملیاتلری تشکیلاتینینگ معلوم قیلیشیچه، عمان ساحللری یقینیده بیر نفت تانکری نامعلوم سنارید هجومیگه اوچرهگن.
تشکیلات بوگون (سهشنبه،۱۶سرطان) اعلان قیلگن بیاناتیده، کېمه هرمز بۉغازی آرقهلی جَنوبگه حرکتلنهیاتگن پیتده ضربهگه اوچرهگنینی بیلدیردی.
گزارشگه کۉره، سنارید تېگیشی آرتیدن کېمهده یانغین یوزهگه کېلگن. بیراق حاضرچه انسان تلفاتلری یاکه اطراف-محیط نینگ افلاسلنیشی حقیده معلومات بېریلمهگن.
شو بیلن بیرگه، اَیریم اېران یېتکرمهلری هم عمان ساحللری یقینیده بیر کېمهگه هجوم قیلینگنینی خبر قیلدی.
دنیای اقتصاد گزیتهسی اۉز منبعلریگه تهیهنیب یازیشیچه، هجومگه اوچرهگن کېمه «الرقایات» ناملی قطر نفت تانکریدیر.
منبعلرگه کۉره، قطر تانکری امریکا دېنگیز کوچلری کوزهتوویده هرمز بۉغازی نینگ عمان تامانی آرقهلی حرکتلنیشنی رېجهلشتیرگن.
خبرده ایتیلیشیچه، کېمه “تکراري آگاهلنتیریشلرگه اعتبار بېرمهگنی” آرتیدن نشانگه آلینگن.
بیراق ایران رسميلری حاضرچه بو خبرنی نه تصدیقلهگن و نه رد اېتگن.
ایران اسلام انقلابی قۉریقچیلری دېنگیز کوچلری هرمز بۉغازیده کېمهلر حرکتی اوچون مخصوص یۉنهلیشنی بېلگیلهگن اېدی.
بونگه جوابن عمان بۉغازده وقتینچهلیک دېنگیز یۉلهگی تشکیل اېتیشنی رېجهلشتیرهیاتگنینی معلوم قیلگن.
شوندن سۉنگ فقط ایران بېلگیلهگن یۉنهلیش خوفسیز اېکنینی تأکیدلب، مقابل یۉللردن حرکتلنهدیگن کېمهلرگه نسبتاً چارهلر کۉریلیشی حقیده آگاهلنتیرگن.
بو حادثه قطر واسطهچیلیگیده ایران و امریکا اۉرتهسیده هرمز بۉغازی آرقهلی کېمهلرنینگ اېرکین حرکتلنیشی همده اۉز ارا صلحگه رعایه اېتیش یوزهسیدن اېریشیلگن سۉنگگی کېلیشوودن کېینگی ایلک دېنگیز حادثهسی حسابلنهدی.
