بیرلشگن ملتلر تشکیلاتی قاچقینلر بۉییچه عالي کمیساری برهم صالح افغانستانگه قیلگن سفری دایرهسیده طالبان باش وزیری اقتصادي مسألهلر بۉییچه اۉرینباسری عبدالغنی برادر بیلن اوچرهشدی.
طالبلر باش وزیری اقتصادي مسألهلر بۉییچه اۉرینباسری ادارهسی بیاناتیگه کۉره، بوگون (۱۷-سرطان، چارشنبه) بۉلیب اۉتگن اوچرهشووده افغانستان قاچقینلری نینگ احوالی، قَیتگن مهاجرلرگه کۉرسهتیلهیاتگن انسانپرورلیک و رواجلنیش یاردملری همده افغانستان خلقینی قۉللب-قوّتلش بۉییچه کېلگوسیدهگی همکارلیک مسألهلری بحث قیلینگن.
عبدالغنی برادر بیرلشگن ملتلر تشکیلاتی و انسانپرورلیک تشکیلاتلرینینگ افغانستان مهاجرلریگه کۉرسهتهیاتگن یاردمی اوچون منّتدارلیک بیلدیریب، قَیتگن مهاجرلر و ایچکی کۉچیریلگن شخصلرنی اوی-جای، تعلیم، برق، ایچیملیک سووی، ایش بیلن تأمینلش همده باشقه اساسي خدمتلر بیلن تأمینلش مقصدیده رواجلنیش لایحهلریگه کۉپراق مبلغ اجرهتیشنی سۉرهگن.
طالبلر بیاناتیگه کۉره، برهم صالح افغانستانگه خلق ارا همجمعیتنینگ قۉشیمچه یاردمینی جلب اېتیش و مملکت اهالیسینینگ تورموش شرایطینی یخشیلش اوچون ضرور سعی-حرکتلرنی دوام اېتتیریشگه وعده بېرگن.
بیرلشگن ملتلر تشکیلاتی قاچقینلر بۉییچه عالي کمیساری بیرلشگن ملتلر تشکیلاتی ترقیات دستوری باشلیغی بیلن اوچ کون آلدین افغانستاندهگی انسانپرورلیک وضعیتی و یاردم یېتکزیش جریانینی اۉرگنیش مقصدیده مملکتگه تشریف بویورگن اېدی.
اولر طالبان رسميلری بیلن اوچرهشیشدن تشقری، بیر نېچه ولایتلرگه هم باریب، محلي اهالی و افغانستانگه قَیتگن مهاجرلر بیلن صحبتلشگن. اولر دوشنبه کونی فرانسه خبرگزارلیگیگه بېرگن صحبتیده افغانستاننی عیاللر و قیزلرنینگ جمعیتدهگی اشتراکیسیز رواجلنتیریش ممکن اېمسلیگینی تأکیدلب، اولرنینگ اجتماعي حیاتدهگی فعال اشتراکی مهملیگینی قید اېتگن اېدی.
