محلي منبعلر اطلاعات روزگه معلوم قیلیشیچه، زابل ولایتینینگ سيوري اولسواللیگیده سابق حربي نامعلوم شخصلر تامانیدن اۉلدیریلگن.
اسمی آشکار اېتیلیشینی ایستهمهگن منبع نینگ ایتیشیچه، اۉلدیریلگن حربی ۳۸یاشلی «سیدجان» بۉلگن.
سیدجان سهشنبه آقشامی (۱۶-سرطان) سيوري تومنی نینگ “لای شار” حدودیده اۉلدیریلگن. گواهلرنینگ ایتیشیچه، اونینگ جسدی تاپیلگچ، اوّل بۉغیب اۉلدیریلگنی، سۉنگره پیچاق ضربهلری بیلن تنهسیگه جراحتلر یېتکزیلگنی انیقلنگن.
منبع نینگ بیلدیریشیچه، سیدجان سابق جمهوریت دوریده پولیس خادیمی بۉلیب خدمت قیلگن.
او اصلیده سيوري تومنی فقراسی بۉلگن، بیراق حاضرگی پیتده زابل ولایتی مرکزی قلات شهریده یشب کېلهیاتگن اېدی.
منبعگه کۉره، جمهوریت حکومتی قولهگنیدن سۉنگ سیدجان تکسی هیداوچیسی بۉلیب ایشلهگن.
زابلدهگی محلي طالبان وکیللری حاضرچه اوشبو حادثه یوزهسیدن هېچ قندهی معلومات بېرمهگن.
سیدجان نینگ قاتللری حاضرچه انیقلنمهگن بۉلسه-ده، سابق حربي خدمتچیلرنی اۉلدیریشده اساسي گماندار صفتیده طالبان تیلگه آلینماقده.
طالبان رهبری هبتالله آخوندزاده تامانیدن اعلان قیلینگن “عمومي عفو”گه قرهمهی، سابق جمهوریت اوردوسی، پولیسی و استخبارات خادملریگه نسبتاً قصاص آلیش همده اولرنی اۉلدیریش حالتلری هنوز دوام اېتماقده.
