پروان ولایتینینگ جبلاسِراج اولسواللیگیده جایلشگن جبلاسراج سمنت فابریکهسینینگ ایکّینچی باسقیچی قوریلیشی رسماً باشلندی.
آچیلیش مراسمی بوگون (پنجشنبه، ۱۸-سرطان) جبلاسِراجدهگی شاه سراییده طالبان باش وزیری نینگ اقتصادي اۉرینباسری ملا عبدالغنی برادر همده اداری اۉرینباسری عبدالسلام حنفی اشتراکیده بۉلیب اۉتدی.
عبدالسلام حنفی نینگ ایتیشیچه، فابریکه ایشگه توشیریلگچ، کونیگه 5 مینگ تُنگچه سمنت ایشلب چیقریش قوّتیگه اېگه بۉلیب، افغانستاندهگی اېنگ ییریک سمنت فابریکهسیگه ایلنهدی.
اونینگ سۉزلریگه کۉره، لایحه۵ مینگ کیشینی ایش بیلن تأمینلش امکانیتیگه اېگه.
مذکور فابریکه طالبلر نظارتیدهگی دولت کارخانهسی – ملي ترقیات شرکتی تامانیدن قوریلهدی و لایحه خرجتلری هم اوشبو شرکت حسابیدن مالیهلشتیریلهدی.
حنفینینگ تأکیدلشیچه، قوریلیش جریانیده اطراف-محیطنی محافظه قیلیش معیارلریگه هم رعایه قیلینهدی و افلاسلنیش نینگ آلدی آلینهدی.
طالبلرنینگ کانلر و پترولیم وزیری هدایتالله بدري نینگ ایتیشیچه، فابریکه کېلگوسی ایکّی ییل ایچیده فایدهلنیشگه تاپشیریلهدی.
اونینگ تأکیدلشیچه، اوشبو فابریکه ایشگه توشگچ، قندههار، یېتیمتاق (جوزجان)، غوري (بغلان) فابریکهلری همده جبلاسِراج فابریکهسینینگ اېسکی ایشلب چیقریش لینيهسی بیلن بیرگهلیکده افغانستان سمنت ایشلب چیقریشده اۉزینی اۉزی تأمینلهی آلهدی.
بدري نینگ معلوماتیگه کۉره، افغانستان حاضرده هر کونی قریب 5 مینگ تُن سمنتنی صادر قیلهدی. ینگی جبلاسِراج زواد فابریکهسی ایشگه توشیریلیشی بیلن بو احتیاج ایچکی ایشلب چیقریش حسابیدن قاپلنهدی.
جبلاوسِراج سمنت فابریکهسی نینگ بیرینچی باسقیچی ۱۳۳۷-هجري قویاش ییلده تشکیل اېتیلگن. سۉنگگی اۉن ییللیکلر دوامیده فابریکه بیر نېچه بار فعالیتینی باشلهگن و تۉختهتگن.
سابق جمهوریت حکومتی ۲۰۱۸-ییلده فابریکهنینگ ایکّینچی باسقیچینی۱۷۰ میلیون امریکا دالری عوضیگه تېندېرگه قۉییشنی رېجهلشتیرگن اېدی، بیراق لایحه عملگه آشمهگن. طالبلر اېسه ۱۴۰۲هجري قویاش ییلده فابریکه نینگ بیرینچی ایشلب چیقریش لینيهسینی رېکانستروکسيه قیلیش و قَیته ایشگه توشیریش بۉییچه 220 میلیون اقش دالری قیمتیدهگی شرطنامهنی قطر شرکتلریدن بیری بیلن امضالهگن.
