سعوديه عربستانی مدافعه وزیرلیگی و یمن نینگ خلقارا مقیاسده تن آلینگن حکومتینی قۉللب-قوّتلاوچی سعوديه باشچیلیگیدهگی حربي (ائتلاف) مطبوعات سۉزلاوچیسی ترکی المالکی حوثيل نینگ هجومی عاقبتیده۱۱ نفر تینچ اهالی یرهلنگنینی معلوم قیلدی.
رویترز خبریگه کۉره ترکی المالکی بوگون (جمعه، ۱۶-اسد) تانگیده هجوم پنجشنبه کونی سعوديه عربستانی نینگ جَنوبیدهگی نجران ولایتیده صادر بۉلگنینی ایتدی.
اونینگ سۉزلریگه کۉره، یرهلنگنلر آرهسیده سعوديه عربستانینینگ ۷ وطنداشی، مصرنینگ ۲فقراسی، یمن نینگ۱ فقراسی و پاکستان نینگ۱وطنداشی بار.
ترکی المالکی یرهدارلر آرهسیده ایکّینچی درجهلی کوییش آلگن تۉرت یاشلی باله هم بارلیگینی بیلدیردی.
او حوثيلرنی تینچ اهالی یشهیدیگن حدودلرنی ترتیبسیز اۉققه توتیش و خلقارا گومانیتار حقوقنی بوزیشده عیبلب، (ائتلاف) تینچ اهالینی حمایه قیلیش اوچون برچه ضرور چارهلرنی کۉریشده دوام اېتیشینی تأکیدلهدی.
یمن حوثيلری حاضرچه سعوديه مدافعه وزیرلیگی و سعوديه باشچیلیگیدهگی (ائتلاف) وکیلی نینگ بو دعوالریگه مناسبت بیلدیرمهگن.
حوثيلر (ائتلاف) نینگ صنعا قۉنالغهسیگه اویوشتیرگن هجومیدن سۉنگ سعوديه عربستانی بیلن صلحنی بېکار قیلیب، مملکتدهگی نشانلرگه هجوملرنی قَیته باشلهگن اېدی.
ایران تامانیدن قۉللب-قوّتلنهدیگن اوشبو قوراللی گروه، شونینگدېک، سعوديه عربستانیگه قرشی دېنگیز قملینی اعلان قیلگن همده حاضرگچه قیزیل دېنگیزده سعوديهگه تېگیشلی سکّیزته نفت تانکرینی نشانگه آلگنینی دعوا قیلگن.
