«افغانستان ملي قرشیلیک جبهه‌سی» و «افغانستان آزادلیک جبهه‌سی» قۉشمه بیاناتده افغانستانده‌گی دیپلوماتیک وکالت‌خانه‌لر، بیرلشگن ملتلر تشکیلاتی‌نینگ اداره‌لری، خلق‌ارا تشکیلاتلر و انسان حقوقلری تشکیلاتلریگه قرشی «اویوشگن تهدیدلر یوز بېریشی احتمالی» حقیده آگاهلنتیردی.
ایکّی جبهه نینگ بوگون (پنج‌شنبه، ۲۳میزان) اعلان قیلگن بیاناتیده شونده‌ی دېییله‌دی: «آلینگن معلوماتلرگه کۉره، طالبلرنینگ خوفسیزلیک توزیلمه‌لری ایچیده‌گی یاکه اولر بیلن باغلیق اَیریم عنصرلر اېکسترېمیستیک ترماقلر و بعضی خارجي دایره‌لر بیلن موافقلشگن حالده افغانستانده‌گی خلق‌ارا منفعتلر و تشکیلاتلرگه قرشی هجوملرنی رېجه‌لشتیریش و عملگه آشیریشگه اورینه‌یاتگن بۉلیشی ممکن.»
ایکّی جبهه‌نینگ تأکیدلشیچه، «بونده‌ی هجوملرنی عملگه آشیرووچیلر اۉزلری‌نینگ حقیقي شخصی و اساسي مقصدلرینی یشیریش اوچون داعش نامیدن یاکه ساخته و چلغیتووچی ناملردن فایده‌لنیشی ممکن».
اولر مسأله‌نینگ نازکلیگینی حسابگه آلگن حالده، بو معلوماتلر مستقل و ایشانچلی خوفسیزلیک تشکیلاتلری تامانیدن تېکشیریلیشی و تصدیقلنیشی کېره‌کلیگینی قۉشیمچه قیلگن.
«ملي قرشیلیک» و «آزادلیک» فرونت جبهه‌لری «بو سناریودن کۉزلنگن مقصد قۉرقوو محیطینی یره‌تیش، خلق‌ارا همجعیتگه طالبلرنینگ خوفسیزلیک توزیلمه‌لریگه احتیاج بار دېگن تصورنی سینگدیریش، دولتلر و خلق‌ارا تشکیلاتلردن سیاسي تاولمچیلیک یۉلی بیلن منفعت آلیش، موجود بحرانلردن جماعتچیلیک اعتبارینی چلغیتیش همده افغانستان خلقی نینگ آزادلیک، عدالت، اساسي حقوقلر و دموکرا‌تیک توزوم برپا اېتیش یۉلیده‌گی قانوني کوره‌شیگه پوتور یېتکزیش» بۉلیشی ممکنلیگینی بیلدیرگن.
اولر دیپلوماتیک وکالت‌خانه‌لر، بیرلشگن ملتلر تشکیلاتی‌نینگ اداره‌لری، انسان پرورلیک تشکیلاتلر، انسان حقوقلری تشکیلاتلری و تینچ اهالی وکیللریگه قرشی هر قنده‌ی هجوم یاکه تهدیدنی قطعي قاره‌لب، اوشبو تشکیلاتلرنی خوفسیزلیک و حمایه چاره‌لرینی جدّي روشده قَیته کۉریب چیقیشگه چقیرگن. شونینگدېک، احتمالي تهدیدلر حقیده‌گی معلوماتلرنی فقط طالبلرنینگ رسمي کاناللریدن آلیش بیلن چېکلنمسلیکنی سۉره‌گن.
طالبلرگه قرشی بۉلگن اوشبو ایکّی فرونت جبهه موجود معلوماتلرنی مستقل روشده تېکشیریش همده بو تهدیدلرنی مانیتارینگ قیلیش، حجتلشتیریش و تېرگاو قیلیش میکانیزمینی یره‌تیشگه چقیرگن.
اولر «اگر بونده‌ی هجوملرنی رېجه‌لشتیریش، عملگه آشیریشگه کۉمکلشیش یاکه بجریشده طالبانگه علاقه‌دار شخصلر، ترماقلر یاکه تشکیلاتلر نینگ اشتراکی اثباتلنسه، هجوم اجراچیلری و بویورتمه‌چیلری شخصي همده تشکیلي درجه‌ده جوابگرلیککه تارتیلیشی کېره‌ک»، دېب بیلدیرگن.
مذکور بیانات طالبلر ایچکی ایشلر وزیرلیگی بیر نېچه کون اوّل «افغانستان ملي قرشیلیک جبهه‌سی» نینگ تۉرت نفر اعضاسینی حبسگه آلگنینی معلوم قیلگنیدن سۉنگ اعلان قیلیندی. وزیرلیک بو شخصلر، جمله‌دن، افغانستانده‌گی بیرلشگن ملتلر تشکیلاتی‌نینگ یاردم اداره‌سی (یوناما) اداره‌سیگه هجوم قیلیشنی رېجه‌لشتیرگنینی بیلدیرگن اېدی.
«افغانستان ملي قرشیلیک جبهه‌سی» طالبلر تامانیدن اۉز اعضالری حبسگه آلینگنینی رد اېتیب، بونی «طالبلر نینگ خارجي تشکیلاتلرگه قرشی هجوم اویوشتیریش اوچون قیله‌یاتگن فتنه‌سی، پراپه‌گنده‌سی و وضعیتنی صنعي روشده کېسکینلشتیریشگه اورینیشی» دېب بهاله‌گن.
