بریتانيا یېتکرمهلری خبریگه کۉره، افغانستاندن بۉلگن بیر اېرکک اسکاتلندده بیر عیالنی زۉرلهگنلیکده عیبدار دېب تاپیلیب، ۷ ییل مدتگه آزادلیکدن محروم اېتیلدی.
عبدال نبیزاده ۲۰۲۱-ییلده ادینبورگ شهریده ۱۹ یاشلی عیالنی تونگی بزمدن اوییگه آلیب کېتهیاتگنیده موتر ایچیده اونگه نسبتاً جنسي زۉرآورلیک صادر اېتگنلیکده عیبلنگن.
بیبیسی انگلیس خبریگه کۉره، ۳۶ یاشلی نبیزاده اوّل افغانستانده بویوک بریتانيا، دانمارک و امریکا حربي کوچلری اوچون ترجمان بۉلیب ایشلهگن. او محکمه ده عیبلاولرنی رد اېتیب، یقینیده پارتلهگن ماین عاقبتیده ترومهدن کېینگی سترېسس بوزیلیشی بیلن آغریگنینی دعوا قیلگن.
بیراق حکم چیقرهیاتگن محکمه جان موریس کیسی نبیزادهگه اونینگ «ایشانچگه نسبتاً دهشتلی خیانت» قیلگنینی ایتدی. اۉتگن آی عالي محکمه حکملر هیئتی اونی بیر آوازدن عیبدار دېب تاپگن اېدی.
تۉرت فرزندنینگ آتهسی بۉلگن عبدال نبیزاده ادینبورگنینگ پیلتان حدودیده یشهگن. او 2016-ییلده بویوک بریتانياگه کېلگنیدن سۉنگ اوشبو مملکت فقرالیگینی آلیش اوچون عریضه بېرگن.
معلوم قیلینیشیچه، او افغانستانده تیکووچی بۉلیب ایشلهگن، بیراق حربي کوچلر بیلن همکارلیک قیلگن و آنه تیلی – فارس تیلیدن پشتو، اوردو همده عرب تیللریگه ترجمه قیلگن.
محکمه ماتریاللریگه کۉره، جبرلنووچی عیال۲۰۲۱-ییل ۱۳-نوامبر کونی دۉستلری بیلن وقت اۉتکزگچ، مست حالتده ادینبورگدهگی مارریسان کۉچهسیده نبیزاده نینگ موتریگه چیققن.
عیال محکمهده اوییگه آلیب باریلیشینی کوتگنینی، بیراق یۉل دوامیده نبیزاده اوندن بیر نېچه بار جنسي علاقه قیلیشنی طلب قیلگنینی ایتگن. اونینگ سۉزلریگه کۉره، او بیر نېچه مرته رد جوابینی بېرگن و اۉزی نینگ ییگیت دۉستی بارلیگینی بیلدیرگن.
شوندن سۉنگ نبیزاده عیالنی پورتوبلو یقینیدهگی جوپا حدودیدهگی چېکّه جایگه آلیب بارگن. عیال نینگ ایتیشیچه، نبیزاده اونینگ تیلفونینی تارتیب آلگن، او بیلن آلیشگن و اتوموبیل ایچیده اونی زۉرلهگن. کېینچهلیک عیال اتوموبیلدن قاچیب چیقیب، بتهلر آرهسیگه یشیرینگن.
محکمه ده جبرلنووچی واقعه حقیده کېینچهلیک قرینداشلریدن بیریگه سۉزلب بېرگنی هم معلوم قیلیندی.
حکم اعلان قیلینیشیدن آلدین نبیزادهنینگ وکیل مدافعی سی دیوید تیلور محکمه گه اونینگ مزاجی اوشبو حکم طفیلی بویوک بریتانيادن دېپورت قیلینیشی خوفی آستیده اېکنینی بیلدیرگن.
