قندهار و غزنی ولایتلریدهگی خوفسیزلیک منبعلرینینگ معلوم قیلیشیچه، اوشبو ایکّی ولایتده ایکّی کیشی اۉلدیریلگن.
قندهاردهگی بیر خوفسیزلیک منبعنینگ ایتیشیچه، ولایتنینگ عینو مینه منطقهسیدن بیر ییگیتنینگ جسدی تاپیلگن بۉلیب، اونینگ تنهسیده قاتللیک علامتلری انیقلنگن.
منبعگه کۉره، هلاک بۉلگن ییگیتنینگ اسمی مقصود احمد بۉلیب، او ارزگان ولایتی مرکزی تیرین کوت شهریده یشهگن.
منبع نینگ قۉشیمچه قیلیشیچه، 21 یاشلی ییگیت اوّل نامعلوم طرزده اۉلدیریلگن، سۉنگ اونینگ جسدی عینو مینه تاغلریگه تشلب کېتیلگن.
حاضرچه اوشبو قاتللیک نینگ سببی و قندهی صادر اېتیلگنی حقیده انیق معلومات بېریلمهگن.
طالبلرنینگ غزنی ولایتی پولیس قوماندانلیگی هم قاره باغ تومنیده بیر کیشی اۉققه توتیلیب هلاک بۉلگنینی معلوم قیلدی.
قوماندانلیک نینگ بیلدیریشیچه، حادثه تیناوون، 20-اسد (سهشنبه) کونی صادر بۉلگن و اوشبو واقعه یوزهسیدن بیر گمانلنووچی قۉلگه آلینگن.
غزنی پولیسی حادثه نینگ سببلری حقیده قۉشیمچه معلومات بېرمهگن.
بوگون اېرتهلب هم قندهار شهریده بیر اېرکک نینگ اۉلدیریلگنی حقیده خبر بېریلگندی.
افغانستان نینگ تورلی ولایتلریده دېیرلی هر کونی قاتللیکلر و جسدلر تاپیلگنی حقیده خبرلر ترقهلماقده. بو طالبلر مملکتده عمومي خوفسیزلیک تأمینلنگنی و جنایتچیلیک جلولنگنی حقیدهگی دعوالریگه قرهمهی صادر بۉلماقده.
