منبعلرنینگ خبر بېریشیچه، طالبلر و بدخشان ولایتی نینگ نسی اولسواللیگیدهگی ناراضی قوماندان، جمعه خان فاتح طرفدارلری اۉرتهسیدهگی تۉقنهشوولر دوام اېتهیاتگن بیر پیتده، طالبلر تیک اوچری اوشبو تومندهگی ینگی بازارنی هوادن نشانگه آلگن.
بیر منبع نینگ «اطلاعات روز»گه معلوم قیلیشیچه، بوگون اېرتهلبگچه تۉقنهشوولر چیزیغی اولسواللیک بازاریده بۉلگن. بیراق بازار ویران بۉلیشی نینگ آلدینی آلیش اوچون فاتیح کوچلری «دوآبگی» کۉپریگی حدودیگه چېکینگن. منبعگه کۉره، جنگلر عینِ شو حدودده دوام اېتماقده.
حاضرچه اوشبو تۉقنهشووده قربانلر سانی حقیده انیق معلومات یۉق. بدخشاندهگی طالبلرنینگ محلي رسميلری حاضرگچه تۉقنهشوولر و تلفاتلر حقیده ایضاح بېرمهگن.
منبع نینگ ایتیشیچه، کېچه بۉلیب اۉتگن جنگلرده جمعه خان فاتح گه قرهشلی تۉرت نفر جنگچی و طالبان نینگ سکّیز نفر اعضاسی هلاک بۉلگن.
طالبلر صفیدهگی منبعلر یېتکرمهلرگه بېرگن صحبتلریده فاتح طرفدارلری بیلن تۉقنهشوو بۉلگنینی تصدیقلهگن.
«بیبیسی دری» طالبل حکومتیدهگی منبعگه تهیهنیب خبر بېریشیچه، کېچهگی تۉقنهشووده طالبلرنینگ بیر اعضاسی هلاک بۉلگن، ینه ایکّی نفری یرهلنگن.
اسمینی آشکار قیلیشنی ایستهمهگن اوشبو منبع تۉقنهشووده جمعه خان فاتح طرفدارلریدن 10 نفری هم هلاک بۉلگنینی دعوا قیلگن.
بیراق جناب فاتح گه یقین منبع هم بی بی سی» بیلن صحبتده طالبان نینگ مخصوص بۉلینمهلری اوشبو تۉقنهشووده «کتّه تلفات» کۉرگنینی دعوا قیلگن.
بیر نېچه آی اوّل بدخشانده طالبلر و اوشبو گروه نینگ تاجیک ملتیگه منسوب قوماندانی اۉرتهسیده کېسکینلیک یوزهگه کېلگنی حقیده خبرلر ترقهلگن اېدی. جناب فاتح طالبلر بیلن کېلیشماوچیلیگی بارلیگینی بیر نېچه بار رد اېتگن و یقینده کابل گه بارگن اېدی.
خبرلرگه کۉره، طالبان اوردوسی باشلیغی فصح الدین فطرت طالبان و جمعه خان فاتح اۉرتهسیده واسطهچیلیک قیلیشگه اورینهیاتگن اېدی.
