طالبلر سۉزلاوچیسی ذبیحالله مجاهد بو گروهنینگ کابلگه کیریب، جمهوریت توزومی اغدریلگنی نینگ بېشینچی ییللیگی مناسبتی بیلن یۉلهگن پیامیده افغانستان خلقیدن قۉللب-قوّتلشنی سۉرهدی.
مجاهد بوگون (شنبه،۲۴ اسد) ملي تلویزیونی آرقهلی نمایش اېتیلگن ویدیوده ایتیشیچه، بېش ییل اوّل عیناً شو کونده «کتّه اوروش و باسقین نهایهسیگه یېتگن» و «اسلامي توزوم حکمرانلیگی اوچون زمین یرهتیلگن».
طالبلر سۉزلاوچیسی اوشبو گروه تامانیدن جاري اېتیلگن، خلقنینگ، اینیقسه مملکت اهالیسینینگ یرمینی تشکیل اېتووچی عیاللرنینگ حقوق و اېرکینلیکلرینی بوزووچی سیاستلرگه تۉختهلمسدن، طالبلر حکمرانلیگینی «نعمت» دېب اتهدی و مردمنی بو توزومنی «قۉللب-قوّتلشگه» چقیردی.
او، شونینگدېک، خلق طالبلرنینگ افغانستانده قَیته حاکمیتنی اېگهلهگنیدن «شکر قیلیشی» و اوشبو گروه نینگ حاکمیتگه قَیتگن ییللیگینی «نشانلشی» کېرهکلیگینی ایتدی.
طالبلر رسميلری اۉزلری نینگ خلق آرهسیدهگی تهیهنچی بارهسیده تورلیچه فکر بیلدیرهدیلر. اَیریملری خلق قۉللب-قوّتلشینی دعوا قیلسه، باشقهلری خلق قۉللاویگه اېگه بۉلیش شرط اېمسلیگینی تأکیدلهیدی.
جملهدن، طالبان تشقی ایشلر وزیری امیر خان متقي یقینده بیبیسیگه بېرگن صحبتیده خلق نینگ تۉلیق قۉللب-قوّتلشیگه اېگه بۉلیش نه ضرور، نه ممکن اېکنینی ایتگن.
