حقوق حمایهسی تشکیلاتی «رواداری» نینگ ایتیشیچه، سۉنگّی بېش ییل دوامیده طالبلرنینگ سرکوب و جنایتلریگه قرشی مدنی مقاومت کېلهجککه بۉلگن امیدنی سقلب قالگن.
رواداری بوگون (شنبه،۲۴ اسد) جمهوریت توزومی قولهگنی و طالبلرنینگ افغانستانده قَیته حاکمیتنی اېگهلهگنی نینگ بېشینچی ییللیگی مناسبتی بیلن نشر قیلگن بیاناتیده مملکتده انسان حقوقلری بوزیلیشینی حجتلشتیریشنی دوام اېتتیریش و کوچهیتیریش ضرورلیگینی تأکیدلهگن.
رواداری: «سۉنگّی بېش ییل دوامیده کېنگ کۉلملی سرکوب و چېکلاولرگه قرهمهی، افغانستان خلقی نینگ، اینیقسه عیاللر و قیزلر نینگ اساسي حقوق و اېرکینلیکلرینی حمایه قیلیش یۉلیدهگی مقاومتی، متانتی و مدنی کورهشی انسان حقوقلری، تېنگلیک و انسان قدر-قیمتیگه اساسلنگن کېلهجککه بۉلگن امیدنی تیریک سقلب قالدی»، – دېب ایتگن.
تشکیلاتنینگ قۉشیمچه قیلیشیچه، بو جریانده مدنی جمعیتی تشکیلاتلری، حقوق حمایهچیلری، عامهوي اخبارات واسطهلری و ژورنالیستلر انسان حقوقلری بوزیلیشلرینی مانیتورینگ قیلیش، حجتلشتیریش، دلیل و حجتلرنی تۉپلش همده سقلش، شونینگدېک، جبرلنووچیلرنینگ آوازینی یېتکزیشده «قیمتلی رۉل» اۉینهگن.
رواداری افغانستانده انسان حقوقلری بوزیلیشینی حجتلشتیریشنی دوام اېتتیریش و کوچهیتیریش ضرورلیگینی تأکیدلب، طالبلرنینگ جمعیت نینگ تورلی قتلملریگه قرشی سرکوپ حرکتلری یوزهسیدن اَیریم آماری معلوماتلرنی نشر قیلگن.
روادارینینگ معلوم قیلیشیچه، ۲۰۲۱-ییل۱۵-اگستدن ۲۰۲۵-ییل ۳۱-دسامبرگچه بۉلگن دورده تورلی حادثهلرده کمیده۶ مینگ۹۲۹ نفر تینچ اهالی هلاک بۉلگن یاکه یرهلنگن. بو حادثهلر قطاریگه مقصدلی، سِرلی و محکمهدن تشقری قاتللیکلر، پارتلشلر و خودکوشلیک هجوملری، اوروشدن قالگن پارتلاوچی مادّهلر همده پاکستان نینگ حربي هجوملری کیرهدی.
شونینگدېک، اوشبو دورده سابق حکومت خادملری و اولر نینگ عایله اعضالریدن کمیده 399 نفری طالبلر و نامعلوم قوراللی شخصلر تامانیدن مقصدلی، سِرلی و محکمه دن تشقری طرزده اۉلدیریلگن.
بوندن تشقری، رواداریگه کۉره، شو دورده تینچ ناراضیلیک نمایشلرینی تشکیل قیلگنی یاکه اولرده قتنهشگنی اوچون کمیده 47 نفر نمایشچی، جملهدن سکّیز نفر عیال اۉلدیریلگن.
رواداری نینگ معلوم قیلیشیچه، طالبلر حکمرانلیگی نینگ دستلبکی تۉرت ییلیده کمیده۶ مینگ۴۳ نفر افغانستان خلقی، جملهدن۷۸ نفر عیال نمایشچی، اساسن طالبان نینگ استخبارات و «امر به معروف» ادارهلری تامانیدن ناقانوني و اۉزباشیمچهلیک بیلن حبسگه آلینگن. حبسگه آلینگنلر آرهسیده کمیده۶۴۶ نفر سابق حکومت خادیمی،۶۴۳ نفر مدنی فعال، ژورنالیست و حقوق حمایهچیسی همده طالبلرگه قرشی گروهلر بیلن همکارلیک قیلگن، اولرگه اعضا بۉلگن یاکه علاقهدارلیکده عیبلنگن۱ مینگ۳۶۶ کیشی بۉلگن.
باشقه تاماندن، شو دورده کمیده۵۱ نفر محبوس طالبان قماقخانهلریدهگی کوچلی قییناقلر عاقبتیده هلاک بۉلگن، ینه کمیده۱۷۱ کیشی مجبورن غایب قیلینگن. بو قربانلر آرهسیده سابق حکومت خادملری، مدنی فعاللری، حقوق حمایهچیلری و باشقه تینچ فقرالر بۉلگن.
رواداری بیاناتیده ایتیلیشیچه، بو دورده طالبان محکمهلری تورلی عیبلاولر بیلن کمیده۲ مینگ۴۲۳ کیشینی «قانونگه خلاف، شفقتسیز و غیرِ انساني» اصوللرده جزالهگن. اوشبو جزالر عامهوي روشده قصاص حکملری و قتل اېتیش، قمچیلش همده عیبلنووچیلر نینگ یوزینی قارهگه بۉیهشنی اۉز ایچیگه آلگن.
رواداری «سرکوب و جنایتلر» دېب اتهگن بوندهی خطی-حرکتلرگه قرهمهی، عیاللر، مدنی فعاللری و حقوق حمایهچیلری نینگ مملکت ایچیده هم، سورگونده هم کورهشی، قرشیلیگی و عدالت طلب قیلیش حرکتلری دوام اېتهیاتگنینی تأکیدلهگن. طالبلر حاکمیتگه کېلگنیدن سۉنگ خارجدهگی حقوق حمایهچیلری تامانیدن تشکیل اېتیلگن رواداری تشکیلاتی مدنی کورهشی طالبلرنینگ تاباره کوچهییب بارهیاتگن چېکلاولری و باسیملریگه قرشی فعال و بردوام دوام اېتیشیگه امید بیلدیرگن. تشکیلات نینگ فکریچه، بو کورهش افغانستانده خلقارا عدالت و جوابگرلیک میکانیزملری نینگ ایشگه توشیریلیشیگه، تورلی حدودلرده بیردملیک نینگ شکللنیشی و کېنگهییشیگه همده مملکتدهگی انسان حقوقلری حالتی حقیده دنیا خبردارلیگی نینگ آشیشیگه خدمت قیلهدی.
