طالبلر تشقی ایشلر وزیرلیگی بدخشاندهگی تۉقنهشوولرده تاجیکستان وطنداشی بۉلگن بیر عیال نینگ هلاک بۉلیشی و تاجیکستان نینگ رسمي ناراضیلیگیگه مناسبت بیلدیریب، بو حادثهگه «بوزغونچی و وضعیتدن فایدهلنیشگه اورینهیاتگن شخصلر» سببچی اېکنینی ایتدی.
طالبلر تشقی ایشلر وزیرلیگی سۉزلاوچیسی عبدالقهار بلخي بوگون (شنبه،۲۴ اسد) بیانات نشر قیلیب، هلاک بۉلگن تاجیکستانلیک عیال نینگ وفاتی مناسبتی بیلن اونینگ عایلهسی و تاجیکستان حکومتیگه تعزیه بیلدیرگن.
تاجیکستان تشقی ایشلر وزیرلیگی کېچه بدخشان خودمختار ولایتی نینگ درواز تومنیدهگی دشتک قیشلاغیده۲۱ یاشلی، حاملهدار عیال افغانستان توپراغیدن آتیلگن اۉق تېگیشی عاقبتیده هلاک بۉلگنینی معلوم قیلگن.
وزیرلیک بو بارهده طالبان حکومتیگه رسمي ناراضیلیک اعتراضینی تقدیم اېتگنینی بیلدیرگن.
اېندیلیکده طالبلر تشقی ایشلر وزیرلیگی سۉزلاوچیسی حادثهگه «بدخشان ولایتی نینگ اَیریم حدودلریده ترتیبسیزلیک یرهتیشگه اورینهیاتگن اَیریم بوزغونچی و وضعیتدن فایدهلنیشگه حرکت قیلهیاتگن شخصلر» سببچی اېکنینی ایتدی.
اونینگ سۉزلریگه کۉره، بو حرکتدن کۉزلنگن مقصد منطقه، اینیقسه طالبان و تاجیکستان جمهوریتی اۉرتهسیدهگی ایشانچ محیطی نینگ خوفسیزلیگی و برقرارلیگیگه سلبي تأثیر کۉرسهتیشدیر.
طالبلر سۉنگی کونلرده بدخشان نینگ نسی تومنینینگ سابق حاکمی جمعهخان فاتح بیلن عینِ اولسواللیک حدودیده تۉقنهشوولرگه کیریشگن.
واقعه جاییدن ترقهلگن ویدیولرده تۉقنهشوولر تاجیکستان بیلن چېگرهداش حدودلرده هم دوام اېتهیاتگنی کۉرینهدی.
جملهدن، بیر حالتده طالبلرنینگ حربي تیک اوچری افغانستان توپراغیده قولهگن. طالبلر مدافعه وزیرلیگی تیک اوچر تهیهنچ اوستونیگه اوریلگنی سبب قولهگنینی بیلدیرگن، بیراق ترقهلگن تصویرلرده اونینگ جوده بلندلیکدن قولهگنی کۉرینهدی.
محلي منبعلر جمعهخان فاتح کوچلری طالبلرنینگ اوشبو حربي تیک اوچرینی اوریب توشیرگنینی ایتگن.
تاجیکستان وطنداشلری تامانیدن تصویرگه آلینگن ویدیولرده اېسه جمعهخان فاتح کوچلری بیلن تۉقنهشوولر وقتیده طالبلرنینگ حربي تیک اوچری تاجیکستان هوا حدودی اوستیدن هم اوچگنی کۉرینهدی.
تاجیکستان تشقی ایشلر وزیرلیگی اۉز هوا حدودی نینگ بوزیلیشی مناسبتی بیلن هم طالبانگه ناراضیلیک بیلدیرگنینی معلوم قیلگن.
بیراق طالبلر تشقی ایشلر وزیرلیگی سۉزلاوچیسی بیاناتیده بو مسألهگه تۉختهلمهگن و تاجیکستانلیک عیال نینگ هلاک بۉلیشینی فقط «بوزغونچی شخصلر» بیلن باغلگن.
