اطلاعات روز: د هلمند روغتیايي مسوولين خبر ورکوي چې ددغه ولايت مرکز په ګډون ۶ ولسواليو کې د ماشومانو د خوارځواکۍ د مخنيوي په موخه یې روغتيايي مرکزونه فعال کړې دي.
د هلمند ولايت د عامي روغتیا ریاست د خوارځواګۍ څانګي مدیر ډاکټر یارمحمد ناصري وايي چي د هلمند د مرکز او ولسوالیو په ۶ روغتیايي مرکزونو کي د دې ناروغۍ درملنه کېږي. او ترڅنګ يې د سوء تغذې ماشومانو لپاره خوراکي توکي په ۱۳۵ روغتیايي مرکزونو کي چمتو شوې دي.
د هلمند د عامې روغتیا ریاست مسوولین وايي چي په دې روغتیايي مرکزونو کي سلګونه په خوار ځواکۍ اخته ماشومان بستر دي چې دامهال يې درملنه روانه ده.
بلخوا د هلمند په مرکز لښګرګاه کې د فاطمه بیات د خوار ځواکۍ د څانګي مشر ډاکټر بسم الله احمدزی وايي يوازي دفاطمه بیات روغتون ته د ورځې ۲۵ تنه ناروغ ماشومان ور وړل کيږي چې ۵ يې په خوارځواکۍ اخته وي.
هغه وايي:« دلته هره ورځ تر ۲۵ تنو زیات ماشومان د خوار ځواکۍ له امله راوړل کېږي ، چي تر کتني وروسته يې ۵ تنه د بستر وړ بلل کېږي.»
احمدزی وايي، د سوء تغذې ماشومانو لپاره کافي امکانات لري ، د ماشومانو د متخصصو ډاکټرانو ترڅنګ صحې لارښوونکي هم شته، چې د درملنې تر څنګ رواني مشورې ورکوي.
د خوار ځواکو ماشومانو متخصص ډاکټر عبدالحلیم وزیري وايي، چي په دې ناروغۍ اخته هر ماشوم تر پنځه ویشت ورځو درملنه کېږي.
ډاکټران وايي چي دا قتصادي ستونزو، غربت، فقر او نا سم پوهاوي له امله په دې ولایت کي ماشومان په خوار ځواکۍ اخته کیږي ، چي اوس مهال يي د درملني لپاره روغتیايي برخه فعاله شوې ده، وايي د دې ترڅنګ باید کورنیو ته د ماشوم د ښې روزني او پالني عامه پوهاوی ورکړل شي.
د هلمند ترڅنګ په ټول افغانستان کې افغان ماشومان د خوارځواکۍ له خطر سره مخ دي او د نړيوالو سازمانونو راپور له مخې نږدي ټول افغانان کافي خوړو ته لاس رسی نه لري.