کابل کې پر زده کوونکو د خونړي بریدونو په غبرګون کې د ملګرو ملتونو سرمنشي انتونیو ګوتریش او د امریکا د بهرنیو چارو وزارت دغه بریدونه غندلي دي.
ګوتریش په یوه ټویټ کې د قربانیانو له کورنیو سره خپله خواخوږي څرګنده کړې او ویلي یې دي چې د ښوونځیو په ګډون پر ملکي وګړو او ملکي تاسیساتو برید د نړیوال بشردوستانه قانون خلاف عمل دی.
د امریکا د بهرنیو چارو وزارت په یوه بیان کې ویلي، چې امریکا د کابل پر«ممتاز» ښوونیز مرکز او «شهید عبدالرحیم» لېسې د وحشتناکو بریدونو په غبرګون کې نړیوالې ټولنې سره یوځای به خپله غوسه څرګنده کړي.
دغه وزارت ټینګار کړی چې د پرونۍ حملې عاملین باید د عدالت منګولو ته وسپارل شي.
د امریکا د بهرنیو چارو وزارت په یوه بیان کې ویلي چې ټول افغان ماشومان ددې حقدار دي چې په خوندي توګه او د تاوتریخوالي له ویرې پرته زده کړې وکړي.
په کور دننه غبرګونونو کې د جمعیت اسلامي ګوند د صلاح الدین رباني څانګې پروني بریدونه غندلي او ویلي یې دي، چې پروني بریدونه یو ځل بیا ددې ښودنه کوي چې « د طالبانو ډله د هیواد والیو امنیت تامینولو کې پاتې راغلي او دا ددوی ماتې او مدیریتي بې کفایتي ده.»
د جمعیت اسلامي ګوند وايي، پرونیو بریدونو وښوده چې طالبان له خپلو ژمنو سره سره، له نورو ترهګرو ډلو سره تنګې اړیکې لري او افغانستان یې د نړیوالې ترهګرۍ په پټنځای بدل کړی دی.
د کابل په لوېديځ کې د هزاره ګانو سيمه پرون سهار د درېو جلا جلا چاودنو شاهده وه. په دغه چاودنو کې د یوه دولتي ښوونځي او ښوونیز مرکز زده کوونکي په نښه شول.
رسمي سرچينو تر اوسه په دې چاودنه کې د مرګ ژوبلې وروستۍ شمېره نه ده په ډاګه کړې. خو د روغتونونو څخه په لاس راغلې شمېرې ښيي چې په بریدونو کې لږ تر لږه ۳۰ کسان وژل شوي یا ټپیان شوي دي. خو په کابل کې د طالبانو امنیې قومندانۍ لومړني معلومات ښیي چې په دغه برید کې ۶ تنه وژل شوي او ۱۱ ټپیان دي.
