اطلاعات روز: د جرمني لومړی وزير اولاف شولتز وايي، کومې ښځې چې په افغانستان او ايران کې د خپلو حقونو لپاره مبارزه کوي، ځپل کېږي او د ده په وينا دا کار د نه بښلو وړ دی.
نوموړي دا څرګندونې په يوه ويډيويي پيغام کې چې د ده پر ټويټر خپره شوې کړې دي.
شولتس وايي: «په ايران او افغانستان کې له هغو ښځو سره چې د خپلو حقونو د اخيستنې لپاره را ولاړې شوې دي او له هغو ټولو سره چې د عدالت او ازادۍ لپاره درېږي او حتا خپل ژوند له خطر سره مخ کوي، په سخت ډول چلند کېږي او دا د بښلو نه دی.»
ده ويلي، چې جرمني د هغو خلکو تر څنګ ولاړ دی چې له بشري او د ښځو له حقونو دفاع کوي.
د جرمني د بهرنيو چارو وزيرې آنالنا بربوک تازه د دې هيواد کابينې ته د فيمينستي بهرني سياست تګلارې وړاندې کړې دي.
د افغانستان لپاره د جرمني سفارت هم وايي، چې په افغانستان کې د ښځو حقونو ته لومړيتوب ورکول تر بل هر وخت ډېر ارزښت لري.
اوس مهال په افغانستان کې ښځې او نجونې د طالبانو تر واکمنېدو وروسته له کار، زده کړو او تحصيل څخه بې برخې دي.