اطلاعات روز: له ايران او افغانستان څخه د ښځينه حقونو فعالانو، حقوق پوهانو او ښځينه رهبرانو په نړۍ کې د «جنسيتي اپارتايد ته نه» انټرنيټي کمپاين په پېلولو سره له هيوادونو غوښتي چې په ايران او په افغانستان کې د طالبانو تر واکمنۍ لاندې «جنسيتي اپارتايد» په رسميت وپېژني.
دوی په يوه سر خلاصي ليک کې د ايران اسلامي جمهوريت او په افغانستان کې طالبان د «جنسيتي اپارتايد» رژيمونه نومولي او ويلي يې دي چې دا حکومتونه له ښځو سره د دويمې درجې وګړو په حيث چلند کوي.
د دې فعالانو په ليک کې راغلي چې د جلاوالي او سيسټماټيکې ايلونې عنصرونه چې اپارتايد را پيدا کوي، اوس مهال په افغانستان او ايران کې شته دي.
دې ښځو زياته کړې چې د طالبانو تر واک لاندې په افغانستان کې ښځې له تحصيل، په دولتي او غير دولتي ادارو کې له کار کولو او له نارينه پرته له اوږده سفر کولو څخه منع دي. همدا راز د دوی په وينا، د ايران په اسلامي جمهوريت کې ښځې له ډېری تحصيلي څانګو، ورزشونو او د مېړه له اجازې پرته د پاسپورټ له اخيستلو او بهر ته له سفر کولو بندې شوې دي.
د دې فعالانو په ليک کې راغلي: «د نړيوالې ټولنې له لوري په جنوبي افريقا کې د اپارتايد د غندنې بېلګې ته په پام، د افغانستان او ايران ښځې د جنسيتي اپارتايد د هغو رژيمونو د ختمولو لپاره د ورته نړيوالو ځوابونو غوښتونکې دي چې دوی پکې ژوند کوي.»
