اطلاعات روز: یوه سرچينه وايي، چې د ايران په فارس ولايت کې يوې ترافيکي پېښې د لسو افغان وګړو ژوند اخيستی دی.
يوې سرچينې اطلاعات روز ورځپاڼې ته وويل، چې دا پېښه تېره شپه (جمعه، ۱۹ د کب) را منځته شوې ده.
د فارس د شمال لارې د پوليسو قومندان عبدالهاشم دهقاني تسنيم خبري اژانس ته ويلي، چې يو موټر چې د افغانستان وګړي پکې سپاره وو، د نی ریز – قطرویه – سیرجان پر لاره له يوې لارۍ موټر سره ټکر کړی دی.
د دهقاني په وينا، په دې پېښه کې درې نفر ژوبل هم دي. د ايراني پوليسو دې چارواکي د پېښې لامل غير قانوني سرعت ګڼلی دی.
د فارس ولايت د بېړنۍ څانګې وياند حسن همتي هم ويلي، چې په دې بريد کې د افغانستان لس وګړي له موټر چلوونکي سره يو ځای وژل شوي دي.
د ده په وينا، د لارۍ موټر چلوونکی له خپلو دوو ملګرو سره ژوبل شوی دی.
يوې سرچينې اطلاعات روز ورځپاڼې ته وويل، چې تر اوسه روغتون ته نهه مړي وړل شوي او يو لا هم ورک دی.
د دې سرچينې په وينا، په وژل شويو کې درې ښځې او دوه ماشومان هم شته دي.
په تېرو وختونو کې هم ورته پېښو د افغانستان د وګړو ژوند اخيستی دی.
دا ډول مرګونې پېښې هغه وخت پېښېږي چې خلک هڅه کوي چې په قاچاقي لارو ځان ايران ته ورسوي.
