اطلاعات روز: يوه ايراني چارواکي ويلي، چې د سعودي پاچا سلمان بن عبدالعزیز ايراني ولسمشر ابراهيم ریيسي ته بلنه ورکړې چې سعودي ته سفر وکړي.
الجزیرې د ايراني ولسمشر د سياسي چارو مرستيال محمد جمشيدي له قوله لیکلي: «د سعودي پاچا ولسمشر رييسي ته په يوه ليک کې کې د دواړو وروڼو هيوادونو تر منځ د روغي هرکلی کړی او رياض ته يې د سفر بلنه ورکړې.» جمشيدي زياته کړې چې «رييسي د دې بلنې هرکلی کړی دی.»
د ايران او سعودي تر منځ تر اوو کلنو کړکېچنو اړيکو وروسته د مارچ پر ۱۰مه د چين په منځګړيتوب دا ستر سيمهييز بدلونونه اعلان شو.
د ۲۰۱۶ کال پر مهال د سعودي له لوري د شيعه عالم نيمرالنمر تر اعدامېدو وروسته ايراني لاريونوالو په تهران کې د سعودي پر ډيپلوماټيک ماموريت بريد وکړ چې تر دې وروسته رياض خپلې اړيکې پرې کړې او دا د دې دوو سيالانو تر منځ له ګڼو جنجالونو يو جنجال و.
ټاکل شوې چې د روغې – جوړې د تړون له مخې به ايران او سعودي عرب په دوو مياشتو کې خپل سفارتونه او ډيپلوماټيک ماموريتونه پرانيزي او د اقتصادي او امنيتي همکاريو شل کاله وړانديني قراردادونه به پلي کوي.
د ايران د بهرنيو چارو وزیر حسين امير عبداللهيان خبريالانو ته د يکشنبې په ورځ وويل، چې د دواړو هيوادونو تر منځ هوکړه شوې چې لوړپوړي ډيپلوماټان به يې غونډه کوي. ده وويل چې د غونډې د ځايونو په اړه هم وړانديزونه شوي، خو مشخص يې نه کړل.
په ۲۰۱۶ کال کې يو شمير خليجي هيوادونو د رياض په تعقيب له تهران سره اړيکې پرې کړې، خو متحده عربي اماراتو او کويټ په تازه ډول ورسره بيرته خپلې اړيکې رغولې دي.
د ايران د بهرنيو چارو وزير امير عبداللهيان ويلي، چې ايران هيله لري چې له بحرين سره به هم اړيکې عادي شي. بحرين د سعودي يو کلک ملاتړی دی او د ۲۰۱۶ پر مهال يې له ايران سره په ګڼو ډيپلوماټيکو اړيکو کې د رياض خوا ونيوله.
بحرين له يو شمير نورو خليجي هيوادونو سره يو ځای د اړيکو د بيرته رغونې لپاره د تهران او رياض تر منځ د موافقې هرکلی کړی دی.
په تېر سپټمبر مياشت کې ايران تر شپږو کلونو وروسته د متحده عربي اماراتو د سفير هرکلی وکړ او همدا راز يوه مياشت وړاندې کويټ هم له ۲۰۱۶ کال را وروسته په لومړي ځل بيرته خپل سفير تهران ته ولېږه.
د ايران لوړپوړي امنيتي چارواکي علي شامخاني د پنج شنبې په ورځ په ابوظبۍ کې د متحده عربي اماراتو له ولسمشر سره خبرې درلودې چې دا په سيمهييزو اړيکو کې يو بل لوی بدلون ګڼل کېږي.
