اطلاعات روز: د خوست ولایت په اسماعېل خېلو او مندوزیو ولسوالۍ کې د یوه جومات ملا امام په کور کې چاودنه شوې، چې له امله یې دوه ماشومان وژل شوي او دوه نور ټپیان دي.
د خوست ولایت لپاره د طالبانو د امنیې قومندانۍ ویاند مستغفر ګربز اطلاعات روز ته وویل، چې دا پېښه نن سهار (سېشنبه، ۲۶ د غویي) د اسماعېلو خېلو او مندوزیو ولسوالۍ اړوند په «بهرام خېلو» سیمه کې د محمد فاروق په نوم د یو ملا امام په کور کې رامنځته شوې، چې دوه کوچنۍ نجونې پکې وژل شوي او یوه بله نجلۍ او هلک ټپیان دي.
ګربز زیاته کړه چې تر اوسه د چاودنې لامل نه دی په ډاګه شوی خو په خبره یې چې په دې اړه یې پلټنې پېل کړي دي.
په ورته مهال بیا د دغه ولایت لپاره د طالبانو د اطلاعات او کلتور رییس شبیر احمد عثماني هم پېښه تاییدوي خو وايي، چې د پلټنو لپاره د مسلکي کسانو یو ټیم سیمې ته رسېدلی دی.
بلخوا په خوست ولایت کې یو شمیر ځايي سرچینې دا پېښه د بې پیلوټه الوتکې هوايي برید یاد کړی او ویلي دي چې له نن سهار راهیسې په مندوزیو ولسوالۍ کې بې پیلوټه الوتکې پروازونه کول، خو په دې اړه یې ډیر څه ونه ویل.
څه موده وړاندې هم په خوست ولایت کې د پاکستانۍ الوتکو له لوري په پاکستاني طالبانو هوايي بریدونه شوي، چې په هماغه وخت کې طالبانو یاده پېښه رد کړې وه.