کونړ او نورستان ولایتونو کې اور لګیدنې لسګونه هکتاره ځنګلونه سوځولي

اطلاعات روز: د طالبانو د طبیعي پېښو پر وړاندې د چمتووالي وزارت وایي، چې د کونړ په پېج درې او د نورستان په کامدېش ولسوالیو په ځنګلونو کې د اور لګیدنې له امله څه باندې ١٨٠ هکتاره ځنګلونه سوځېدلی دی.

د دغه وزارت لپاره د طالبانو ویاند شفیع الله وایي، چې لګیدلی اور لاهم دوام لري او دوی هڅه کوي چې د شته امکاناتو څخه په ګټې اور په بشپړ ډول مهار کړي.

بل لور ته کونړ کې د طالبانو سیمه ییز مسوولین بیا وایي، د دغه ولایت د پېج درې ولسوالۍ په «کوړنګل او سوندرۍ» درو کې لګېدلی اور لا هم نه دی مړی شوی او درېیمې ورځې ته غځېدلی دی.

د پېج درې لپاره د طالبانو ولسوال حضرت ګلاب وایي، د دغې ولسوالۍ په کوړنګل او سوندرۍ درو کې بل شوی اور نن (دوشنبه، ۵ د چنګاښ) هم جریان لري، خو په خبره یې اوس مهال تر پخوا کنټرول شوی او د شدت مخه یې نیول شوې ده.

نوموړي وویل، د دغې اورلګېدنې له امله شاوخوا ۸۰ جریبه ځنګل او د څارویو څړ ځایونه په بشپړ ډول سوځېدلي دي.

حضرت ګلاب زیاتوي، د سیمې لسګونه کسان د اور د مهار لپاره له دولتي مسوولینو سره په ګډه په سیمه کې دي او هڅه کوي، چې یاد اور په چټکۍ سره مړ کړي.

اخوا د نورستان په کامدېش ولسوالۍ کې د اور لګېدنې په تړاو بیا د نورستان لپاره د طالبانو مسوولینو ناخبري ښودلې.

د دغې اور لګېدنې لامل تر اوسه نه دی څرګند، خو باور دادی، چې ډېری مهال د شپنو له لوري د پخلي په موخه د اور بلولو او د تودوخې د لوړې درجې له امله دا ډول اور لګېدنې را منځته کېږي.

تېر کال هم په کونړ او نورستان ولایتونو کې په ځنګله کې اور لګېدنه را مځنته شوې وه، چې سلګونه جریبه ځنګل یې سوځولی وو.