اطلاعات روز: کونړ کې د طالبانو مسوولین وایي، چې د دغه ولایت په پېج درې ولسوالۍ کې درې سیلانیان د سیند اوبو مړه او دوه نور یې ژوبل کړي دي.
د کونړ د پېج درې ولسوالۍ لپاره د طالبانو ولسوال حضرت ګلاب وایي، چې تېره ورځ (جمعه، ۹ د چنګاښ) له ماسپښین وروسته شاوخوا درې بجې له کابل څخه راغلي درې ځوان سیلانیان د پېج درې ولسوالۍ په «کنډه ګل» سیمه کې د سیند اوبو وړي او دوه نور یې ژوبل کړي دي.
نوموړی زیاتوي، د دغو سیلانیانو له ډلې یې یو کس سیند کې د لمبا پرمهال اوبو ډوب او له ځان سره وړی، چې دوو نورو ملګرو یې د ژغورنې په موخه ځانونه اوبو ته اچولي، چې هغوی یې هم وړي دي.
د حضرت ګلاب په خبره، ډوب شویو درې واړو کسانو پسې د هغوی دوو نورو ملګرو ځانونه اچولي، چې وروسته د ځایي خلکو له لوري په ژوبل حالت کې ژغورل شوي دي.
هغه وایي، ځایي خلکو د سیلانیانو جسدونه له سیند ویستلي او د کونړ روغتیایي مسوولینو ته یې سپارلي دي.
د طالبانو دغه مسوول زیاته کړه، چې مړه شوي سیلانیان د کابل ولایت د ګلدرې ولسوالۍ اوسېدونکي وو، چې د اختر په ورځو کې کونړ ولایت ته په چکر راغلي وو، چې په پېج درې ولسوالۍ کې د لمبا پرمهال د سیند اوبو له ځان سره وړي او مړه شوي دي.
دا په داسې حال کې ده، چې هلمند کې هم د اختر په لومړۍ او دوهمه ورځ دوه ځوانان اوبو ډوب او مړي کړي دي.
