اطلاعات روز: په پکتيکا ولايت کې د ناوړه دودونو او لوړ ولور د مخنيوي په موخه قومي تړون شوی، چې له مخې يې د پېغلې نجلۍ ولور ۳۰۰زره افغانۍ ټاکل شوی، کوم چې له دې وړاندې ان تر یو میلیون افغانيو هم اخيستل کېده.
قومي مشرانو دا پرېکړه تېره ورځ (شنبه، ۸ د تلې) کړې او په شوې پریکړه کې ويل شوي چې د کونډې ښځې ولور به دوه سوه زره افغانۍ وي او د ښادۍ او غم په مراسمو کې به د شوي پرېکړه ليک سره سم مصارف ترسره کيږي.
قومي مخورو ويلي، چې دا اقدام د دغه ولايت لپاره د طالبانو د والي، امنيې قومندانۍ او ځايي مشرانو په همغږۍ ترسره شوی دی.
دوی زياته کړې چې په دغه پرېکړه کې په بدو کې د نجونو ورکړه منع اعلان شوې او که چا سرغړونه وکړه نو له ټاکل شوې ناغې سره به مخ کيږي.
ځايي خلکو هم له دې پرېکړې هرکلی کړی او وايي، د لوړ ولور او نورو بېځايه مصارفو له امله ځوانان بهرنيو هيوادونو ته په قاچاقي تګ او اوږدو مسافريو مجبوره کړي دي.
د مرکز ښرنې يو اوسېدونکي حاجي نور وويل، چې د ناوړه دودونو له امله په ډيره سيمو کې کورنی تاوتريخوالی هم رامنځته کيږي.
نوموړی د دغې پرېکړې په عملي کېدو ټينګار کوي او زياتوي که دغه پرېکړه تعقيب نه شي ښايي د لنډ وخت لپاره دوام وکړي.
له دې وړاندې په پکتيا او د خوست ولايت په ځينو سيمو کې هم ورته تړونونه شوي، چې ځينو کې عملي شوي خو ځينې نورو کې بيا لاهم پخواني ناوړه دودونه پر ځای پاتې دي.
