اطلاعات روز: په خوست ولايت کې د طالبانو د نرخونو کنټرول او اصنافو تنظيم لپاره ټاکل شوي کميسيون د هغو درملتونونو د بندېدو لړۍ پېل کړې، چې قانوني جواز نه لري او يا هم په خلکو له ټاکل شويو نرخونو پورته درمل پلوري.
د خوست ولايت لپاره د طالبانو ښاروالۍ رياست د يوې خبرپاڼې په خپرولو سره ويلي، چې په لومړي اقدام کې یې تېره ورځ (چهارشنبه، ۳ د لړم) څلور هغه درملتونونه وتړل چې د کميسيون له لوري یې په سپارل شويو لارښوونو عمل نه و کړی.
په خبرپانه کې همدا راز راغلي چې ياد کميسيون له روغتياپالانو غوښتنه کړې چې له شفري نسخو ډډه وکړي، تر څو ناروغ لرونکي د خپل خوښې درملتون څخه درمل وپيري.
په همدې حال کې بيا د خوست ښاریان هم له دې پېل شوي اقدام خوښ دي، خو ټينګار کوي چې ياده کړنه دې له توپيري چلند پرته ترسره شي او د دوی په وينا ټولې هغه دواخانې چې قانوني جواز نه لري او يا هم د غير مسلکي کسانو له لوري پرمخ وړل کيږي په کلکه دې مخنيوی وشي.
دا په داسې حال کې ده، چې په دې وروستيو کې په خوست ښار کې د بې کيفيته درملو او د درملو له لوړو بيو د خلکو شکايتونه په بېساري ډول زيات شوي دي.
هېره دې نه وي چې څو ورځې وړاندې په خوست ښار کې د درملو هغه کارخونه ونيول شوه، چې له چونې به يې جعلي درمل جوړول.
