اطلاعات روز: د طالبانو د رییس الوزرا اقتصادي مرستيال عبدالغني برادر د ايران د ملي امنيت د شورا له عمومي منشي علي اکبر احمديان سره په ليدنه کې ويلي، چې افغانستان به د خپل هيڅ ګاونډي لپاره ګواښ نه وي.
د ايران-ايرنا د دولتي خبري خبري اژانس له راپور سره سم، دا ليدنه چې د يکشنبې (۱۴ د لړم) په مازديګر شوې، د امنيتي او اقتصادي مسايلو، وروستيو سيمهييزو بدلونونو او غزې د وضعيت په اړه پکې خبرې شوې دي.
د ايرنا په وينا، احمديان ويلي چې د ايران اسلامي جمهوريت د افغانستان د خپلواکۍ، ټيکاو، امنيت او پرمختګ ملاتړ کوي.
د ايران د ملي امنيت د عالي شورا منشي په سوداګريزو او صنعتي چارو، حمل و نقل او کرنه کې پر همکارۍ او د دې هيواد د حقابې پر تأمينېدو ټينګار کړی دی.
احمديان د غزې وضعيت ته په اشارې، له فلسطين او غزې څخه د افغانستان ملاتړ ستايلی دی.
د ايرنا له وينا سره سم، عبدالغني برادر په دې ليدنه کې د دواړو هيوادونو ترمنځ د اقتصادي او سوداګريزو همکاريو پر پراختيا، په ځانګړې توګه د د ټرانزيټ حوزې پر فعالولو، چابهار بندر او د هوايي ترانسپورټ په برخه کې پر همکارۍ ټينګار کړی دی.
ده د دواړو هيوادونو ترمنځ د تړونونو پلي کولو ته په ځانګړې توګه په اوبيزه حوزه کې د طالبانو ژمنتيا ښودلې، د پولو اقتصادي کول او په دې تړاو ګډه پانګونه يې د دواړو هيوادونو په ګټه ګڼلې ده.
ايرنا ليکلي، چې عبدالغني برادر «له تروريزم سره په مبارزه کې د افغانستان ارادې ته په اشارې او د پولو د امنيت په اړه د ډاډ په ورکولو سره ويلي، چې افغانستان به د خپل هيڅ ګاونډي لپاره ګواښ نه وي».
ده له ايرانه مننه کړې چې د افغانستان د کډوالو کوربتوب يې کړی دی.
د طالبانو د رییس الوزرا د اقتصادي مرستيالۍ دفتر د عبدالغني برادر له خولې ويلي، چې ايران د افغانستان د کډوالو په تړاو «اسلاميت، انسانيت، ګاونډيتوب او د کډوالو حقونه په رسميت پېژني».
ايران او پاکستان له څو لسيزو راهيسې د ميليونونو افغان کډوالو کوربتوب کوي.
پاکستان په دې وروستيو کې د بې اسناده کډوالو ايستل پېل کړي دي. په دې ورځو کې په زرګونو تنه اړ کېږي چې افغانستان ته ستانه شي.
