اطلاعات روز: په لوګر کې د طالبانو د پوهنې رياست مسوولين وايي، چې په دې ولایت کې د محمد اکبر اتل په نوم يو ځوان د نږدې يو ميليون افغانيو په شخصي لګښت يو ښوونځي ته ودانۍ جوړه کړې ده.
د دې ولایت د پوهنې رياست څخه نن (دوشنبه، ۶ د لیندۍ) په خپره شوې خبرپاڼه کې راغلي چې دا ودانۍ د مرکز پل عالم اړوند بيدک په سيمه کې د بيدک لومړني ښوونځي لپاره جوړه او ګټې اخيستنې ته وسپارل شوه.
دوی زياته کړې چې د دې ودانۍ لپاره ځايي خلکو خپله دوه جريبه ځمکه هم په وړيا ډول ورکړې، چې څلور ټولګي، اداري خونه او نور اړين وسايل هم ورته اخيستل شوي دي.
په دغه ښوونځي کې د نجونو په ګډون په يو وخت ۲۰۰ زده کوونکي زده کړې کولای شي.
ياد ځوان له دې وړاندې هم په دغه ولايت کې يو بل ښوونيز مرکز ته په ۲.۴ ميليونه افغانيو ودانۍ جوړه کړې او ۴۰۰ زده کوونکو ته په کې د زده کړو زمينه برابره شوې ده.
