اطلاعات روز: د طالبانو د بهرنيو چارو وزارت سرپرست امير خان متقي په تهران کې د فلسطين په اړه په جوړ شوي کانفرانس کې حاکم نړیوال نظم «له تضادونو ډک، د دوه ګونو معيارونو لرونکی او څو ګونی» بللی او ويلي، يې دي چې په دې نظم کې بدلون حتمي دی. همدا راز د طالبانو دې چارواکي د بشري حقونو د نقض له کبله پر دې ډلې بنديز «يوه لويه مسخره» بللې ده.
نوموړي ويلي، چې په غزه کې نسل وژنه روانه ده او کومه نړۍ چې د بشري حقونو، انساني ارزښتونو، ازادۍ او عدالت خبره کوي «د دې وحشيانه عامه وژنې ننداره چيان دي».
متقي ويلي: «په دې توګه موږ د سترو تضادونو په وخت کې ژوند کوو.»
د طالبانو د بهرنيو چارو وزارت سرپرست زياته کړې، چې په اوسنۍ نړۍ کې هيوادونه د بشري حقونو د «جزيي» نقض او «سياسي دلايلو» له امله له بنديز سره مخ کېږي، خو د ده په وينا په عين حال کې اسراييل چې په جګړه کې يې ټول معيارونه مات کړي دي، له وړې نیوکې سره هم نه مخ کېږي.
متقي ويلي: «که وغواړو او که ونه غواړو، که ووايو او که ونه وايو، د ننني انسان وجدان نشو کولای له دې تناقضاتو سره ويده وساتو. په غزه کې د فلسطينيانو تر نسل وژنې او د صهيونيستي رژيم تر ازاد پرېښودلو وروسته دا ستر تناقضات په کافي اندازه په ډاګه شوي او د داسې وضعيت د رامنځته کېدو له کبله په نړيوال وضعيت کې بدلون حتمي دی.»
د طالبانو ياد چارواکي پر دې ډلې د بشري حقونو د نقض له کبله بنديز «لویه مسخره» بللې او ويلي يې دي چې «کله چې افغانستان تر څلور لسيزو بريدونو، جګړې او ګډوډۍ وروسته د امنيت او ثبات لور ته روان دی، د بشري حقونو په نوم بنديز پرې لګول کېږي».
د طالبانو پر چارواکو د بشري حقونو په ځانګړې توګه د ښځو د حقونو د نقض له کبله بنديز لګېدلی. دې ډلې د واک له ترلاسه کولو وروسته پر ښځو او نجونو سخت بنديزونه لګولي او اوس مهال دا قشر د کار او زده کړو حق نه لري.
د طالبانو د بهرنيو چارو وزارت په تهران کې د غونډې پر مهال طالبان د «اسلامي امت جز» ګڼلي او ويلي يې دي «په غزه او فلسطين کې د صهيونيستي رژيم روان ظلمونه اشغال نور هم ځواکمن کوي او د شرعي نصوصو او نړيوالو حقونو له مخې د فلسطين د ملت مبارزه مشروع او قانوني چاره ده.»
د فلسطين په اړه د تهران کانفرانس پرون (شنبه، ۲ د مرغومي) جوړ شو. تهران وايي چې په دې غونډه کې د ۴۰ هيوادونو استازو ګډون درلود.
د ايران د بهرنيو چارو وزير حسين امير عبداللهيان وايي، چې د دې غونډې اصلي موخه د فلسطين له خلکو سره د مرستې لپاره په سياسي او نړيوالو دريځونو کې زياته همغږي رامنځته کول دي.
ده ويلي: «د غزې د خلکو د نسل وژنې په دې پړاو کې زموږ موخه داده چې وکولای شو څو اړخيز اقدامات وکړو او بايد ټول پوه شي چې فلسطين او راتلونکی يې د دې هيواد په خلکو پسې اړه لري.»
