اطلاعات روز: په خوست ولايت کې د طالبانو د پوهنې رياست وايي چې هغه خصوصي تعليمي مرکزونه يې تړلي چې له «قانوني جواز» پرته يې فعاليت کاوه.
ياد رياست د يوې خبرپاڼې په خپرولو سره ويلي چې دا اقدام يې نن (سېشنبه، ۲۶ د مرغومې) ترسره کړی او زياته کړې يې ده چې ياد تعليمي مرکزونه په مرکز او اړوندو سيمو کې فعال و او د پوهنې رياست له «قانوني جواز» پرته يې فعاليت کاوه.
همدا راز خبرپاڼه کې ويل شوي چې کوم مرکزونه جواز ولري کولای شي فعاليت وکړي.
د طالبانو د پوهنې رياست نه دې ويلي چې څومره «ناقانونه» تعليمي مرکزونه يې تړلي دي.
بل پلو په خوست ولايت کې ځينې زده کوونکي او ښوونکي پر دې پرېکړه نيوکه کوي او وايي چې د دې مرکزونو د تړل کیدو له امله زرګونه ځوانان له ژمنيو زده کړو محرومیږي.
په دې اړه خوست کې د يوه خصوصي تعليمي مرکز ښوونکي د نوم نه ښودنې په شرط اطلاعات روز ته ويلي چې د کورسونو او نورو تعليمي مرکزونو تړل د حل لار نه ده او بايد د اسنادو تر جوړېدو ورته د فعاليت اجازه ورکړل شي.
نوموړی وايي: «زه دا وايم چې پوهنې رياست دې د ماليې لپاره د ماشومانو پر مخ د رڼا دروازې نه تړي، ځکه د لرې پرتو سيمو ځوانان ښار ته لاسرسی نه لري او دوی مجبور دي چې د خپلو سيمو په دې کورسونو کې زده کړې وکړي.»
په خوست کې لسګونه خصوصي تعليمي مرکزونه د ژمي پر مهال په پراخ شمېر کې زده کوونکي لري او د کانکور ازموينې ته د چمتوالي تر څنګ په نورو برخو کې هم ښوونيز خدمات وړاندې کوي.
