اطلاعات روز: د چورلکې لوېدو په پېښه کې د ايران د ولسمشر ابراهيم رييسي او د دې هیواد د بهرنيو چارو د وزير حسين امير عبداللهیان مړينې ته په افغانستان کې سياسي ډلو او اشخاصو پراخ غبرګونونه ښودلي دي.
د طالبانو رییس الوزرا محمد حسن اخوند ويلي، چې دا ډله د قربانيانو کورنيو، د ايران ملت او حکومت ته تسليت وايي، او په «دې غم کې» ځان شريک بولي.
د طالبانو د رییس الوزرا په اعلاميه کې راغلي چې «په دې سختو شرایطو کې د ايران د خلکو تر څنګ يو» او د قربانيانو د کورنيو لپاره صبر غواړو.
د «افغانستان ژغورنې لپاره د ملي مقاومت شورا» هم د يوې اعلاميې په خپرولو سره د ايران د ولسمشر او نورو چارواکو د مړينې په تړاو تسليت ويلی دی.
د دې شورا په اعلاميه کې راغلي: «د افغانستان او ايران خلک د مشترک تاريخ په اوږدو کې د يو بل په غم او خوښۍ کې شريک وو او بې له شکه چې دا ويرجنه پېښه يوازې تر ايراني ملت پورې منحصره نه ده او د افغانستان خلک يې هم له کبله سخت غمجن او اغېزمن شوي دي.»
د احمد مسعود په مشرۍ د «افغانستان د ملي مقاومت جبهې» هم د دې پیښې په تړاو تسليت ويلی او زياته کړې يې ده چې «موږ په دې سختو شرایطو او دې غم او لوی مصيبت کې د ايران د دولت او خلکو تر څنګ يو او ځان په دې لوی وير کې شريک ګڼو.»
د «افغانستان د ازادۍ جبهې» هم د چورلکې د لوېدو په پېښه کې د ايراني ولسمشر او نورو چارواکو د مړينې په تړاو تسليت ويلی او زياته کړې يې ده چې «ايراني وګړي له کلونو راهيسې زموږ د هيوادوالو کوربانه دي او په سختو کلونو کې زموږ د خلکو تر څنګ درېدلي دي.»
دې جبهې ويلي: «باور لرو چې د ايران اسلامي جمهوريت به د دې پېښې له کبله را پيدا کېدونکی کړکېچ او زيان مديريت کړي او ترې تېر به شي او افغانستان به هم يوه ورځ د ترهګرو له منګولو خلاص شي او د ايران او افغانستان وګړي به د تل په څېر سولييز ګاونډيتوب ولري.»
د محمد محقق په مشرۍ د افغانستان د خلکو د اسلامي وحدت ګوند هم د دې پېښې له کبله د ايران خلکو ته تسليت ويلی او زياته کړې يې ده چې «د اسلامي ايران لپاره د ثبات او لا ځواک غوښتنه کوي.»
د افغانستان د اسلامی وحدت ګوند مشر محمد کريم خليلي هم د دې پېښې له کبله تسليت وړاندې کړی او زياته کړې يې ده چې د ايران له دولت او خلکو سره غمشريکي او خواخوږي کوي.
جمعیت اسلامی افغانستان هم د ايراني ولسمشر او نورو ايرانيو چارواکو د مړينې په تړاو تسليت ويلی دی.
د دې ګوند په اعلاميه کې راغلي چې «ولسمشر رييسي د دولت د مشرتوب له پېله په داخل کې د ايران د اقتصادي ښيرازۍ د پراختيا، له ګاونډيانو سره د اړيکو د پراخولو او د سيمهييزې پراختيا په لړ کې د سيمهييزې اجماع د تامينولو لپاره هڅې کولې.»
د افغانستان ډېرو نورو شخصيتونو او څېرو هم دې پېښې ته غبرګونونه ښودلي او د ايران له دولت او خلکو سره يې خواخوږي ښودلې.
د ایراني ولسمشر، بهرنيو چارو د وزير او يو شمېر نورو چارواکو الوتکه تېره ورځ د دې هيواد د ختيځ اذربايجان ولايت په ورزقان سيمه کې ولوېده.
د ژغورنې او پلټنې عمليات تر نن سهار پورې روان وو او د الوتکې د لوېدو د ځای تر مشخص کېدو او سيمې ته د مرستندويو ډلو تر رسېدو وروسته ايراني حکومت اعلان وکړ چې د دې هيواد ولسمشر او ورسره ملګري کسان په دې پېښه کې وژل شوي دي.
