اطلاعات روز: قطر او انډونیزیا افغان زدهکوونکو ته په انډونیزیا کې د تحصیلي بورسونو د ورکړې په تړاو د همکارۍ هوکړهلیک لاسلیک کړی دی.
د قطر د بهرنیو چارو وزارت په یوه اعلامیه کې ویلي، چې د دې هوکړهلیک موخه د همکارۍ د چوکاټ رامنځته کول دي ترڅو انډونیزیا کې د تحصیلي بورسونو له لارې د افغانستان لپاره اړتیا وړ انساني ظرفیت جوړ شي.
په اعلامیه کې راغلي چې د تحصیلي بورسونو پروګرام د قطر او اندونیزیا د ګډ لیدلوري او مأموریت یوه برخه ده چې په افغانستان کې د تعلیمي او پرمختیايي پروژو ملاتړ کوي. د دې پروژو ځانګړی تمرکز د داسې فرصتونو پر رامنځته کولو دی چې افغان ځوانان په خپل هیواد کې د یوه روښانه او بریالي راتلونکي په موخه پیاوړي کړي.
د قطر د بهرنیو چارو وزارت مرستیالې لولوه الخاطر له افغانستان سره د خپل هیواد د همکارۍ ډاډ ورکړی او د قطر د ۷۵ میلیونه ډالري مرستې یادونه يې کړې.
د انډونیزیا د بهرنیو چارو وزیر رتنو مرسودي ویلي، چې افغان زده کوونکو ته د تحصیلي بورسونو د ورکړې په تړاو له قطر سره د ده د هیواد همکاري د افغانستان د روښانه راتلونکې لپاره کلکه ژمنتیا او د همکارۍ روحیه ښيي.
نوموړي زیاته کړې چې په افغانستان کې روان بشري ناورین په ځانګړي ډول د افغان ښځو او نجونو لپاره د عاجلې زده کړې پر اړتیا ټینګار کوي.
هغه یادونه کړې چې انډونیزیا نه یوازې د زدهکړې لارې برابروي، بلکې د افغانانو د وطن د بیا رغونې لپاره د دوی مقاومت او هیله هم لوړوي.
قطر او انډونیزیا داسې مهال د افغان زدهکوونکو لپاره د تحصیلي بورسونو د ورکړې هوکړهلیک لاسلیک کوي چې طالبانو ښځې او نجونې له زدهکړو منع کړې دي.
