اطلاعات روز: د قطر امیر تمیم بن حمد آل ثاني او د ترکیې ولسمشر رجب طیب اردوغان په یوې ګډه بیانیه کې په افغانستان کې د اساسي حقونو د درناوي او پراخ بنسټه حکومتوالۍ پر اهمیت ټینګار کړی دی.
دغه بیانیه د قطر او ترکيې د عالي ستراتيژۍ کميټې د لسمې غونډې په مناسبت چې د تېرې پنجشنبې په ورځ په انقره کې جوړه شوې وه، خپره شوې ده.
د دغې بیانیې په یوه برخه کې د افغانستان یادونه هم شوې او ویل شوي چې قطر او ترکیې په افغانستان کې د ثبات د ټینګښت لپاره پر خپلو ژمنو ټینګار کړی دی.
د قطر او ترکیې د مشرانو په بیانیه کې راغلي چې دواړو لورو په افغانستان کې اساسي حقونو ته د درناوي او پراخ بنسټه حکومتولۍ پر اهمیت، له دغه هېواد سره د همغږې اړیکو پر اړتیا او دغه راز د بشري مرستو پر دوام او د خلکو لپاره یې پر دوامدار پرمختګ ټینګار کړی، لکه څنګه چې د یوې خپلواکې ارزونې لخوا ټاکل شوي دي.
بشري حقونو ته درناوى او د يوه ټولګډونه حکومت جوړول له طالبانو څخه د يو شمېر هېوادونو ګډه غوښتنه ده، خو طالبانو تر اوسه دغو غوښتنو ته مثبت ځواب نه دی ویلی.
اوس مهال په افغانستان کې د طالبانو تر حاکمیت لاندې ښځې او نجونې له خپلو اساسي حقونو بې برخې دي. د طالبانو حکومت هم د سړيو په لاس کې دی او ټول د دې ډلې غړي دي.
بشري حقونو ته درناوى او د يوه ټولګډونه حکومت جوړول د هغو هېوادونو له شرايطو څخه دي چې غواړي د طالبانو حکومت په رسميت وپېژني؛ هغه حکومت چې له دریو کلونو په تیریدو سره لاهم په رسمیت نه دی پیژندل شوی.
