اطلاعات روز: د هلمند ولایت په ګرشک ولسوالۍ کې ځایي سرچیني وايي چې په دې ولسوالۍ کې د دوو بېلابېلو ترافیکي پېښو له امله درې تنه مړه شوي او د ښځو او ماشومانو په ګډون اووه تنه نور ټپیان شوي دي.
د سرچینو په وینا، لومړۍ پېښه نن (دوشنبه، ۲۹ د سلواغې) د دې ولسوالۍ «سپین مسجد» اړوند سیمه کې د یو موټر د تیز رفتار له امله رامنځته شوې ده.
د پیښي د عیني شاهدانو په وینا، ټپیان د درملنې لپاره د سیمي روغتون ته انتقال شوي چې د ځینو روغتیايي وضعیت نازک ښودل شوی دی.
همدا راز دویمه پېښه هم نن د ګرشک ولسوالۍ په «لوی مانده» سیمه کې د یوه «۵۸۰» ډوله موټر او موټرسایکل تر منځ شوې چې له کبله یې موټرسایکل چلوونکی مړ شوی او یوه ښځه ژوبله شوې ده.
د سیمې اوسېدونکي د ترافیکي پېښو د زیاتوالي په اړه اندېښنه لري او وایي که موټرچلوونکي احتیاط ونه کړي او ترافیکي قوانین رعایت نه کړي، دا ډول پېښې به نورې هم زیاتې شي.
د یادونې وړ ده چې په افغانستان کې د سړکونو خرابوالی، د موټرچلوونکو بې احتیاطي او چټک سرعت د ترافیکي پېښو عمده لاملونه ګڼل کېږي چې هر کال لسګونو کسانو ته مرګژوبله اړوي.
